ឃាត់ខ្លួនមុខសញ្ញាចំនួន០២នាក់ក្នុងករណីលួចកាច់សោកម៉ូតូ
ខេត្តបាត់ដំបង! កម្លាំងនៃអធិការដ្ឋាននគរបាលស្រុកបវេល សហការជាមួយកម្លាំងនៃអធិការដ្ឋាននគរបាលស្រុកថ្មគោល និងកម្លាំងនគរបាលការិយាល័យព្រហ្មទ័ណ្ឌកម្រិតស្រាល បានចុះអនុវត្តបង្រ្កាបឃាត់ខ្លួនមុខសញ្ញាចំនួន០២នាក់ក្នុងករណីលួចកាច់សោកម៉ូតូក្នុងបទល្មេីសជាក់ស្តែង ។
លោកវរសេនីយ៍ឯក សុខ សារិន អធិការស្រុកបវេលបានអោយដឹងថា កិច្ចប្រតិបត្តិការខាងលើនេះធ្វើឡើងនៅវេលាម៉ោង១៧និង៣០នាទី ថ្ងៃទី២៥ ខែកញ្ញា ឆ្នាំ២០២២ នៅចំណុចវត្តក្បាលថ្នល់ ស្ថិតក្នុងភូមិក្បាលថ្នល់ ឃុំព្រៃខ្ពស់ ស្រុកបវេល ខេត្តបាត់ដំបង ក្រោមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង ។
ជនសង្ស័យត្រូវបានឃាត់ខ្លួន
១-ឈ្មោះ ហាន យី ភេទប្រុស អាយុ ៣៥ ឆ្នាំ មានទីលំនៅមិនពិតប្រាកដ
២-ឈ្មោះ ម៉ោង ផល្លា ភេទស្រី អាយុ២៩ឆ្នាំ រស់នៅក្រុម០៦ ភូមិសង្កែវារ ឃុំបវេល ស្រុកបវេល ខេត្តបាត់ដំបង ជនសង្ស័យទាំងពីរនាក់បានធ្វើសកម្មភាពជិះម៉ូតូ០១គ្រឿងម៉ាកហុងដាឌ្រីម ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ បាត់ដំបង 1AB – 3943 និងបានកាច់សោកម៉ូតូ០១គ្រឿងទៀត ម៉ាកហុងដាឌ្រីម ពណ៌ខ្មៅ ពាក់ស្លាកលេខ បន្ទាយមានជ័យ 1X-4788 នៅចំណុចកើតហេតុខាងលើ ជារបស់ជនរងគ្រោះ ឈ្មោះ ជា សម្បត្តិ ភេទប្រុស អាយុ ៦៥ ឆ្នាំ មានទីនៅភូមិសាមគ្គីមានជ័យ ឃុំប៉ោយប៉ែត ស្រុកអូរជ្រៅ ខេត្តបន្ទាយមានជ័យ ហេីយបានជិះម៉ូតូម្នាក់០១គ្រឿងគេចខ្លួនបាត់ ។
ក្រោយទទួលបានបណ្តឹងភ្លាមៗសមត្ថកិច្ចបានធ្វេីការស្រាវជ្រាវនិងស្ទាក់បង្រ្កាបបានរួមជាមួយវត្ថុតាងមាន៖
-ម៉ូតូចំនួន២គ្រឿង(០១គ្រឿងជារបស់ជនសង័្សយជិះធ្វេីសកម្មភាពនិងមួយគ្រឿងទៀតជារបស់ជនរងគ្រោះ) ហើយក្រោយពីបង្ក្រាបបានជនសង្ស័យខាងលើត្រូវបានសមត្ថកិច្ចកំពុងកសាងសំណុំរឿងបញ្ជូនមកការិយាល័យជំនាញខេត្តអនុវត្តបន្តតាមនីតិវិធី រីឯម៉ូតូរបស់ជនរងគ្រោះត្រូវបានប្រគល់ជូនម្ចាស់វិញផងដែរ៕
