ឆ្លងប្រឡាយលើកទ្រូ ទាំងមិនទាន់ស្វាងស្រា ភ្លាត់ស្នៀតធ្លាក់ចូលទឹក លង់ស្លាប់យ៉ាងអាណោចអាធ័ម

បាត់ដំបង ៖ បុរសម្នាក់បានលង់ទឹកប្រឡាយ ស្លាប់យ៉ាងអាណោចអាធ័ម កាលពីវេលាម៉ោង ០៩និង៥០នាទី ថ្ងៃទី១៣ ខែកញ្ញា ឆ្នាំ២០២២ នៅចំណុចប្រឡាយបឹងក្រឡ ស្ថិតក្នុងក្រុមទី១៣ភូមិបឹងសំរោង ឃុំល្វា ស្រុកបវេល ខេត្តបាត់ដំបង ។

សមត្ថកិច្ច បានអោយដឹងថា សពជនរងគ្រោះមានឈ្មោះ ម៉ន ណេន ភេទប្រុស អាយុ ៥៨ឆ្នាំ  រស់នៅភូមិ- ឃុំខាងលើ ហើយបើឆ្លងតាមការបំភ្លឺរបស់ឈ្មោះ ជៀប ចាំ ភេទស្រី អាយុ៦៨ឆ្នាំ មុខរបរធ្វើស្រែ ត្រូវជាប្រពន្ធរបស់ជនរងគ្រោះ បានបំភ្លឺថា កាលពីថ្ងៃទី១២  ខែកញ្ញា ឆ្នាំ២០២២ ប្តីរបស់ខ្លួនបានផឹកស្រាស្រវឹងរហូតដល់យប់ជ្រៅ លុះព្រឹកឡើងថ្ងៃទី១៣ ខែកញ្ញា ឆ្នាំ២០២២ វេលាម៉ោង ០៨និង៣០នាទី ប្តីរបស់ខ្លួនមិនទាន់ស្វាងស្រាទេ ហើយបានបបួលខ្លួនទៅលើកទ្រូនៅចំណុចប្រឡាយបឹងក្រឡ ចម្ងាយពីផ្ទះប្រហែល១៥០ម៉ែត្រ ប៉ុន្តែខ្លួនឈឺជើង ដើរមិនទាន់គាត់  លុះពេលខ្លួនដើរទៅដល់កន្លែងដាក់ទ្រូ ក៏បានលឺសម្លេងក្តុងៗ ហើយខ្លួនបានស្រែកហៅប្តី តែមិនឃើញ ខណៈនោះ ខ្លួនបានស្រែកហៅបងប្អូនអោយជួយរក តែទឹកជ្រៅហូរខ្លាំង ពេលនោះប្អូនយ៉ាន់ ,ប្អូនជិន ,ប្អូនធី បានចុះមុជរាវរក បានប្រហែល២០នាទី ទើបរកឃើញ ហើយស្រង់យកមកធ្វើចលនាដង្ហើម ប៉ុន្តែគាត់បានស្លាប់បាត់ទៅហើយ។

ក្រោយធ្វើការពិនិត្យសាកសពរួចរាល់ សមត្ថកិច្ច និងគ្រូពេទ្យ បានសន្និដ្ឋានថា សពរបស់ជនរងគ្រោះខាងលើគឺស្លាប់ដោយសារលង់ទឹកប្រឡាយពិតប្រាកដមែន ដោយសារជនរងគ្រោះស្រវឹងស្រា មិនទាន់ស្វាងចុះឆ្លងប្រឡាយលើកទ្រូ ហើយចាប់មែកឈើបណ្តាលអោយបាក់ធ្លាក់ទឹកប្រឡាយ និងម្យ៉ាងវិញទៀតជនរងគ្រោះមិនចេះហែលទឹក ៕