យុវជនសាខាកាកបាទក្រហមកម្ពុជាខេត្តប៉ៃលិន ចំនួន ២៥នាក់នៃវិទ្យាល័យហ៊ុន សែនក្រុងទេពនិម្មិតប៉ៃលិន ទទួលបានវគ្គបណ្តុះបណ្តាលជាមូលដ្ឋាន
ខេត្តប៉ៃលិន៖ នៅថ្ងៃទី០៩ ខែកញ្ញា ឆ្នាំ២០២២នេះ ដោយមានការចង្អុលដឹកនាំពីលោកជំទាវបាន ស្រីមុំ ប្រធានគណៈកម្មាធិការសាខាកាកបាទក្រហមកម្ពុជាខេត្តប៉ៃលិនលោកជំទាវពៅ សុខ អនុប្រធានអចិន្ត្រៃយ៍គណៈកម្មាធិកាសាខាបានអញ្ជើញជាអធិបតីភាពក្នុងពិធីបើកវគ្គបណ្តុះបណ្តាលមូលដ្ឋានស្តីពីប្រវត្តិចលនាកាកបាទក្រហម-អឌ្ឍចន្ទក្រហមតួនាទីភារកិច្ចរបស់យុវជន និងវិជ្ជាសង្គ្រោះបឋម រយៈពេល១ថ្ងៃពេញជូនដល់យុវជនសាខាកាកបាទក្រហមកម្ពុជាខេត្តប៉ៃលិនចំនួន២៥នាក់(ស្រី ១៣នាក់) នៅទីស្នាក់ការសាខាកាកបាទក្រហមកម្ពុជា ខេត្តប៉ៃលិន។
លោកជំទាវ ពៅ សុខ បានពាំនាំនូវប្រសាសន៍ពីសំណាក់លោកជំទាវបាន ស្រីមុំ ប្រធានគណៈកម្មាធិការសាខាកាកបាទក្រហមកម្ពុជាខេត្តប៉ៃលិនផ្តាំផ្ញើសួរសុខទុក្ខដល់ក្មួយៗយុវជនទាំងអស់ដែលបានចូលរួមជាមួយចលនាមនុស្សធម៌របស់កាកបាទក្រហមកម្ពុជាសំដៅជួយរំលែកទុក្ខលំបាករបស់ជនរងគ្រោះ និងងាយរងគ្រោះដោយប្រការផ្សេងៗ។
លោកជំទាវបានគូសបញ្ជាក់ពីគោលបំណងនៃការបើកវគ្គនេះគឺដើម្បីពង្រឹង និងពង្រីកកម្លាំងមនុស្សធម៌ ក្នុងនោះឱ្យយុវជនកាកបាទក្រហមយើងបានយល់ដឹងស៊ីជម្រៅពីចលនាកាកបាទក្រហម តួនាទីភារកិច្ចរបស់ខ្លួន និងវិជ្ជាសង្គ្រោះបឋម ដែលជាមុខវិជ្ជាមួយអាចជួយសង្គ្រោះ ឫកាត់បន្ថយការឈឺចាប់របស់ជនរងគ្រោះដោយគ្រោះថ្នាក់ផ្សេងៗបាន មុនឡានពេទ្យ ឫក្រុមគ្រូពេទ្យមកដល់ ជាពិសេសការសង្គ្រោះក្នុងបរិបទជំងឺកូវីដ១៩ ។
ឯកឧត្តម ឌឹន គឹម នាយកប្រតិបត្តិសាខា មានប្រសាសន៍សូមសម្តែងនូវការកោតសរសើរវាយតម្លៃខ្ពស់ចំពោះលទ្ធផលនៃការបញ្ចប់វគ្គនាថ្ងៃនេះ និងបានមានមតិផ្តាំផ្ញើដល់ ក្មួយៗយុវជនទាំងអស់ត្រូវខិតខំរៀនសូត្រនៅសាលាដើម្បីជាទំពាំងស្នងឬស្សី បណ្តុះគំនិតអោយចេះស្រលាញ់ការងារសង្គមដើម្បីខ្លាយខ្លួនជាយុវជនគំរូ ត្រូវជៀសវាងអោយឆ្ងាយនូវទង្វើមិនគម្បីនានាដែលសង្គមស្ពប់ខ្ពើម និងអោយយកចំណេះវិជ្ជាដែលបានសិក្សាយកទៅចែករំលែងបន្តដល់សិស្សានុសិស្ស ។
