មន្ទីរពហុព្យាបាល និងសម្ភពព្រះវិហារ សង្ស័យធ្វើការធ្វេសប្រហែសបណ្តាលឱ្យស្ត្រីម្នាក់ ស្លាប់ទាំងម្ដាយនិងកូនក្នុងផ្ទៃ រួចបញ្ជូនទៅពេទ្យ១៦មករាចង់យករួចខ្លួន
ព្រះវិហារ៖ ស្ត្រីម្នាក់មានអាការៈឈឺពោះសម្រាលកូន ពេលសម្រាលកូនទី២ មន្ទីរពហុព្យាបាល និងសម្ភពព្រះវិហារ ដោយសង្ស័យធ្វើខុសបច្ចេកទេស និងធ្វេសប្រហែសបណ្តាលឱ្យស្ត្រីម្នាក់ស្លាប់ទាំងម្ដាយ និងកូនក្នុងផ្ទៃ រួចបញ្ជូនទៅកាន់មន្ទីរពេទ្យបង្អែក១៦មករា ខេត្តព្រះវិហារចង់យករួចខ្លួន ។
ប្រភពព័ត៌មាន បានឱ្យដឹងថា ក្រុមមន្ទីរពហុព្យាបាល និងសម្ភពព្រះវិហារ ដោយសង្ស័យធ្វើការខុសបច្ចេកទេស និងធ្វេសប្រហែសទុកស្ដ្រីដែលត្រូវសំរាលកូនរយៈពេលយូរមិនព្រមធ្វើការវះកាត់តាមការទាមទាររបស់ប្ដី ទើបបណ្ដាលឱ្យស្ដ្រីរងគ្រោះ ប្រឹងរហូតអស់កម្លាំង បន្ទាប់ពីគ្រូពេទ្យដាក់ថ្នាំសណ្ដំបម្រុងធ្វើការវះកាត់។
ប្រភពដដែល បានបន្ដថា ស្ត្រីរងគ្រោះឈ្មោះ ខៃ ស្រីទូច អាយុ ៣៤ឆ្នាំ នៅភូមិពោធិ៍ខឿន ឃុំពោធិ៍ ស្រុកត្បែងមានជ័យ ខេត្តព្រះវិហារ បានស្លាប់រួមនិងកូនប្រុសក្នុងផ្ទៃ កាលពីព្រឹកទី០៤ ខែកញ្ញា ឆ្នាំ ២០២២ បន្ទាប់ពីចូលសំរាលកូនទី២ រយៈពេល១យប់ មិនបានសម្រេច។
ប្រភពដដែល បានបន្ថែមទៀតថា បានឱ្យដឹងថា ស្ដ្រីរងគ្រោះធ្លាប់សំរាលកូនប្រុសដំបូង ដោយវិធីវះកាត់ គឺមានសុវត្ថិភាព។ ក្រោយមកទៀតនាង បានពពោះកូនប្រុសទី០២ ដោយនាងមានសុខភាពរឹងមាំធម្មតា និងបានតាមដានសុខភាព ជាប្រចាំទៀតផង។ លុះដល់ព្រលប់ថ្ងៃទី០៣ ខែកញ្ញា ឆ្នាំ២០២២ នាងបានឈឺពោះហើយក៏ធ្វើដំណើរជាមួយប្ដី ទៅសំរាលកូនទី២ នៅមន្ទីរពហុព្យាបាល និងសម្ភព ព្រះវិហារ ស្ថិតនៅភូមិឡឥដ្ឋ សង្កាត់កំពង់ប្រណាក ក្រុងព្រះវិហារ ខេត្តព្រះវិហារ ក្នុងនោះក្រុមគ្រូពេទ្យបានឱ្យនាងសំរាក១យប់ ស្រាប់តែព្រឹកឡើងថ្ងៃទី០៤ ខែកញ្ញា ឆ្នាំ ២០២២ នាងបានស្លាប់រួមនិងកូនក្នុងផ្ទៃ។
ជុំវិញករណីនេះលោក យ៉ាន់ ម៉េងហាក់ មេបញ្ជាការរងមូលដ្ឋានកងរាជអាវុធហត្ថក្រុងព្រះវិហារ ត្រូវជាប្ដីរបស់ស្ដ្រីរងគ្រោះ បានទ្រហោយំ ប្រាប់អ្នកសារព័ត៌មានថា លោកពិតជាអាណិតប្រពន្ធនិងកូនខ្លាំងណាស់ និងមិនអាចទទួលយកបានទេ ចំពោះការស្លាប់នេះ។លោកថា មុនពេលទៅសំរាលកូន គឺប្រពន្ធរបស់លោក មានសុខភាពរឹងមាំធម្មតា។ ដោយនាងឈឺពោះគ្រប់ខែ លោកក៏នាំនាងទៅសំរាលកូននៅ”មន្ទីរពហុព្យាបាល និងសម្ភព ព្រះវិហារ”។ ក្នុងនោះគ្រូពេទ្យ បានឱ្យស្ដ្រីរងគ្រោះសំរាកក្នុងមន្ទីរពេទ្យ ខណៈរូបគាត់ជាប្ដីនៅមើលថែប្រពន្ធក្នុង មន្ទីរពេទ្យផងដែរ។
គ្រួសារជនរងគ្រោះ បន្តថា នៅយប់ថ្ងៃទី០៣ ខែកញ្ញា ២០២២ ប្រពន្ធខ្លួនបានឈឺពោះបែកទឹកភ្លោះ ប្រុងសំរាលកូន ដោយឃើញអាការៈប្រពន្ធបែបនោះខ្លួនបារម្ភជាខ្លាំង ព្រោះថា កាលនាងសំរាលកូនទី១ ក៏វះកាត់ដែរ រូបលោក បានទទូចសុំឱ្យក្រុមគ្រូពេទ្យ ធ្វើការវះកាត់ ដើម្បីជួយពន្លឿន កុំឱ្យស្ដ្រីរងគ្រោះឈឺពោះយូពេក ខ្លាចនាងអស់កម្លាំង។ ប៉ុន្តែក្រុមគ្រូពេទ្យបានធ្វេសប្រហែស មិនយកចិត្តទុកដាក់មិនអើពើ វះកាត់តាមការទាមទារនោះឡើយ ។ ដោយទុកឱ្យនាងប្រឹង សំរាលតាមបែបធម្មជាតិ ខណៈបែកទឹកភ្លោះយូផងនោះ បណ្ដាលឱ្យនាងអស់កម្លាំងជិតផុតដង្ហើម ។
ដោយឃើញសភាពបែបនោះ ក្រុមគ្រូពេទ្យបានដាក់ថ្នាំសណ្ដំឱ្យនាងសន្លប់ ដើម្បីធ្វើការវះកាត់ ស្របពេលនោះនាងអស់កម្លាំងផង ហើយត្រូវថ្នាំសណ្ដំទៀតបណ្ដាលឱ្យនាងស្លឺភ្នែក ដកចង្កាមាន់ ដេកស្ដូកលែងដឹងខ្លួន លែងរើបម្រាសអ្វីទាំងអស់។ ក្រោយឃើញនាង ស្ដូកស្ដឹងបាត់ដង្ហើមលែងដឹងខ្លួនបែបនេះ ទើបក្រុមមន្ទីរពហុព្យាបាល និងសម្ភពព្រះវិហារ បានសម្រេចបញ្ជូនស្ត្រីរូបនេះ ទាំងតក់ក្រហល់ទៅកាន់មន្ទីរពេទ្យបង្អែក១៦មករា ខេត្តព្រះវិហារ ដើម្បីគេចពីការទទួលខុសត្រូវ ។
បើតាមលោក សុក វាសនា ប្រធានមន្ទីរពេទ្យបង្អែក១៦មករា ខេត្តព្រះវិហារ បានថ្លែងប្រាប់ «ព័ត៌មានក្នុងស្រុក» នៅរសៀលថ្ងៃទី០៦ ខែកញ្ញា ឆ្នាំ២០២២នេះថា ពេលនោះស្ដ្រីរងគ្រោះត្រូវបានដឹកមកកាន់ មន្ទីរពេទ្យបង្អែករបស់លោក ត្រឹមតែ២៥នាទីប៉ុណ្ណោះ រួចក៏ដឹកសពទៅធ្វើបុណ្យ ។ចំពោះការវិនិច្ឆ័យបែបណានោះ លោកសូមមិនបកស្រាយឡើយ ដោយថា ជំនាញកំពុងស្រាវជ្រាវ។
ពាក់ករណីខាងលើនេះ អង្គភាពយើងទូរស័ព្ទសុំការបំភ្លឺពីមន្ទីរពហុព្យាបាល និងសម្ភពព្រះវិហារផងដែរ តែសម្ភពមិនអាចនិយាយបាន ឱ្យអ្នកព័ត៌មានយើងទៅជួបតំណាងសម្ភព។
ក្រុមគ្រួសារនៃសព អះអាងថា មន្ទីរពហុព្យាបាល និងសម្ភពព្រះវិហារកំពុងចរចាអំពីសំណងជូនក្រុមគ្រួសារគាត់ ដើម្បីបញ្ចប់រឿង តែករណីនេះធ្វើឲ្យមជ្ឈដ្ឋានមួយចំនួន ចង់ឃើញក្រសួងសុខាភិបាល និងស្ថាប័នពាក់ព័ន្ធ អនុវត្តច្បាប់យ៉ាងតឹងរ៉ឹងចំពោះគ្រូពេទ្យដែលខ្វះវិជ្ជាជីវៈនិងខ្វះភាពទទួលខុសត្រូវ ដើម្បីចូលរួមកែទម្រង់វិស័យសុខាភិបាលនៅកម្ពុជា ដែលជាទំនុកចិត្តរបស់ប្រជាពលរដ្ឋ ។
យ៉ាងណាប្រជាពលរដ្ឋបានសំណូមពរដល់ក្រសួងសុខាភិបាល និងស្ថាប័នពាក់ព័ន្ធ មេត្តាចាត់វិធានការលើមន្ទីរពេទ្យនេះ និងលោកគ្រូពេទ្យ អ្នកគ្រូពេទ្យ ដែលគ្មានសមត្ថភាព វិជ្ជាជីវៈផង។បើនៅតែបណ្តែតបណ្តោយទៀត ច្បាស់ជាវិស័យសុខាភិបាលនៅកម្ពុជា ដែលជាទំនុកចិត្តរបស់ប្រជាពលរដ្ឋនឹងធ្លាក់ចុះនិងអស់ជំនឿដោយសារខ្វះការទទួលខុសត្រូវ ពេលជនរងគ្រោះបាត់បង់ជីវិតជាមិនខាន ៕
