ឯកឧត្តម អ៊ុំ រាត្រី ដឹកនាំមន្ត្រីរាជការ ចុះជួយច្រូតស្រូវពលរដ្ឋដែលលិចលងដោយសារ ជំនន់ទឹកភ្លៀង
បន្ទាយមានជ័យ ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ នៅថ្ងៃទី១៧ ខែសីហា ឆ្នាំ២០២២ បានដឹកនាំមន្ត្រីរាជការ និងកងកម្លាំងទាំង៣ប្រភេទ ចុះជួយច្រូតស្រូវពលរដ្ឋ ដែលលិចលងដោយសារ ជំនន់ទឹកភ្លៀង នៅសង្កាត់ភ្នៀត និងសង្កាត់កោះពងសត្វ ក្រុងសិរីសោភ័ណ ខេត្តបន្ទាយមានជ័យ ។
ពលរដ្ឋដែលជាម្ចាស់ស្រែ បានថ្លែងអំណរគុណ ចំពោះថ្នាក់ដឹកនាំ មន្ត្រីរាជការ និងកងកម្លាំងប្រដាប់អាវុធទាំងអស់ ដែលបានចុះជួយប្រមូលផលគាត់ ជាពិសេសចុះជួយប្រជាពលរដ្ឋគ្រប់កាលៈទេសៈ មិនខ្លាចនឿយហត់ មិនថាទីណាកន្លែងណា។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានសម្តែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មេបញ្ជាការគ្រប់កងឯកភាព ស្នងការនគរបាលខេត្ត អធិការ និងកងកម្លាំងទាំងអស់ក្នុងខេត្ត ដែលជានិច្ចកាលមានស្មារតីចូលរួមជួយដោះស្រាយទុក្ខលំបាករបស់ប្រជាពលរដ្ឋនៅមូលដ្ឋាន គ្រប់ពេលវេលា ក្រៅពីកិច្ចស្នូលអង្គភាពរបស់ខ្លួន ។
ក្នុងនាមគណៈបញ្ជាការឯកភាព បានត្រៀម រៀបចំកងកម្លាំង សម្ភារៈ និងមធ្យោបាយ ដើម្បីជួយសង្គ្រោះដល់ប្រជាពលរដ្ឋដែលរងគ្រោះ ដោយសារគ្រោះមហន្តរាយផ្សេងៗ នៅតាមបណ្ដាក្រុង-ស្រុក ទូទាំងខេត្តទាំងមូល ៕
