ប្រមូលផ្ដុំគ្នាផឹកស៊ី ក្នុងខារ៉ាអូខេ ល្មើសនិងវិធានការទប់ស្កាត់ជំងឺកូវីដ-១៩ ត្រូវសមត្ថកិច្ច ឃាត់ខ្លួន ជាង២០នាក់

73

បាត់ដំបង ៖ យ៉ាងហោចណាស់មានមនុស្សប្រុសស្រីជាង២០នាក់ ត្រូវបានកម្លាំងការិយាល័យប្រឆាំងគ្រឿងញៀន សហការជាមួយកម្លាំងនៃអធិការដ្ឋាននគរបាលស្រុកកំរៀង ចុះប្រតិបត្តិការបង្ក្រាបឃាត់ខ្លួន ពាក់ព័ន្ធករណីប្រមូលផ្តុំសម្រួលអោយប្រើប្រាស់ដោយខុសច្បាប់នូវសារធាតុញៀន និងល្មើសច្បាប់ស្តីពី វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ។

លោកវរសេនីយ៍ឯក សុខ និមល ប្រធានការិយាល័យប្រឆាំងគ្រឿងញៀន នៃស្នងការខេត្តបាត់ដំបង បានអោយដឹងថា ប្រតិបត្តិការខាងលើនេះ ធ្វើឡើងនៅវេលាម៉ោង ១៧និង០០នាទី ថ្ងៃទី០១ ខែឧសភា ឆ្នាំ២០២១ នៅចំណុចខារ៉ាអូខេពិភពថ្មី ស្ថិតក្នុងក្រុមទី០១ ភូមិអូរដាលើ ឃុំបឹងរាំង ស្រុកកំរៀង ខេត្តបាត់ដំបង។

ជាមួយគ្នានេះ ដែរសមត្ថកិច្ចជំនាញបានធ្វើការឃាត់ខ្លួនមនុស្សប្រុសស្រី សរុបចំនួន២៦នាក់ ដែលអ្នកទាំងអស់គ្នារស់នៅឃុំបឹងរាំង ស្រុកកំរៀង ខេត្តបាត់ដំបង រួមជាមួយវត្ថុតាងដកហូតបានមាន ៖ ថ្នាំញៀនប្រភេទមេតំហ្វេតាមីន(ម៉ាទឹកកក ICE)ចំនួន០១ថង់ ទម្ងន់៤,៤៤ក្រាម,  ទូរស័ព្ទដៃចំនួន០៩គ្រឿង, រថយន្តចំនួន០១គ្រឿង ។

លោកប្រធានការិយាល័យបានបញ្ជាក់បន្ថែមថា ក្រោយពីឃាត់ខ្លួនជនល្មើសចំនួន ១៧នាក់និងវត្ថុតាងត្រូវបានសមត្ថកិច្ចជំនាញ កសាងសំណុំរឿងបញ្ជូនទៅតុលាការ ចំណែកជនល្មើសចំនួន០៩នាក់ ស្រី០៧នាក់ ជាអនិតិជន០១នាក់ ត្រូវបានធ្វើកិច្ចសន្យាអប់រំបញ្ឈប់ការប្រើប្រាស់ថ្នាំញៀន និងប្រគល់ទៅអោយអាណាព្យាបាល យកទៅអប់រំបន្តនៅសហគមន៍វិញផងដែរ ៕

ដោយ ៖ សាលី

ចំណែក