ក្រុមពេទ្យស្ម័គ្រចិត្តឯកឧត្តម ហ៊ុន ម៉ានី ចុះចាក់វាក់សាំងកូវីដ-១៩ ជូនលោកគ្រូ-អ្នកគ្រូ សិស្សនៅខេត្តបន្ទាយមានជ័យ
បន្ទាយមានជ័យ ៖ នៅថ្ងៃទី២២ ខែកក្កដា ឆ្នាំ២០២២ ក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានចុះចាក់វាក់សាំងកូវីដ–១៩ ជូនលោកគ្រូ-អ្នកគ្រូ សិស្សនៅនៅបរិវេណវិទ្យាល័យសិរីសោភ័ណ ស្ថិតក្នុងក្រុងសិរីសោភ័ណ ខេត្តបន្ទាយមានជ័យ ។
ការចុះចាក់វ៉ាក់សាំងនេះ ប្រព្រឹត្តទៅក្រោមវត្តមាន ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងមានការចូលរួមពីលោកវេជ្ជបណ្ឌិតឡេ ច័ន្ទសង្វាត ប្រធានមន្ទីរសុខាភិបាលខេត្ត លោកឈូរ ប៊ូនរឿង ប្រធានមន្ទីរអប់រំ យុវជននិងកីឡាខេត្តមានការចូលរួមពីសំណាកលោក–លោកស្រី ក្រុមការងារសុខាភិបាល សហភាពសហព័ន្ធយុវជនកម្ពុជាខេត្ត លោក ហ៊ឹល រ៉ាយ៉ា អភិបាលក្រុងសិរីសោភ័ណ លោកគ្រូ–អ្នកគ្រូ សិស្សានុសិស្សជាច្រើននាក់ទៀតផងដែរ ។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានមានប្រសាសន៍ ថ្លែងអំណរគុណយ៉ាងជ្រាលជ្រៅ ចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានខិតខំខ្នះខ្នែង ស្វែងរកវ៉ាក់សាំងមក ចាក់ជូនប្រជាពលរដ្ឋក្នុងក្របខ័ណ្ឌទូទាំងប្រទេស ដោយឥតគិតថ្លៃ ។
ឯកឧត្តម ក៏បានអំពាវនាវដល់លោកគ្រូអ្នកគ្រូ សិស្សានុសិស្ស គ្រប់អាយុកាលត្រូវចាក់វ៉ាក់សាំង សូមរួសរាន់ មកទទួលការចាក់វ៉ាក់សាំងការពារជំងឺកូវីដ–១៩ ឱ្យបានគ្រប់ៗគ្នា និងបន្តអនុវត្តវិធានការ ៣កុំ ៣ការពារ ឱ្យបានខ្ជាប់ខ្ជួន ៕
