ព័ត៌មានជាតិ
ឆមាសទី១ ឆ្នាំ២០២២ ថៃបញ្ជូនពលករខ្មែរ ជាង៧ម៉ឺននាក់ មកកម្ពុជា តាមច្រកចំនួនបួន នៃខេត្តបន្ទាយមានជ័យ
បន្ទាយមានជ័យ ៖ ក្នុងរយៈពេល៦ខែ ឆមាសទី១ ឆ្នាំ២០២២ មានពលករខ្មែរ ជាង៧ម៉ឺននាក់ ត្រូវបានអាជ្ញាធរសមត្ថកិច្ចថៃ ចាប់បញ្ជូនមកកម្ពុជាវិញ តាមច្រកចំនួនបួន នៃខេត្តបន្ទាយមានជ័យ ។
យោងតាមរបាយការណ៍របស់មជ្ឈមណ្ឌល សំចតប៉ោយប៉ែត ក្នុងកិច្ចប្រជុំសម្របសម្រួល និងវគ្គបណ្តុះបណ្តាល ស្តីពី ការធ្វើចំណាកស្រុកប្រកបដោយសុវត្ថិភាព នៅសាលាក្រុងប៉ោយប៉ែតក្នុងរយៈពេលពីរថ្ងៃ ថ្ងៃទី២០–២១ ខែកក្កដា ឆ្នាំ២០២២ ដោយមានការចូលរួមពីលោកស្រី រស់ សុផានី អភិបាលរងខេត្ត តំណាងឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងអស់លោក –លោកស្រីស្ថាប័ន អង្គភាព សមត្ថកិច្ចពាក់ព័ន្ធ អង្គការដៃគូរផងនោះ បានបង្ហាញពីទិន្នន័យពលករវិលត្រឡប់ពីប្រទេសថៃ ចូលមកកម្ពុជាវិញ នៅឆមាស១ ឆ្នាំ២០២២ មានពលករ–ពលការិនី កម្ពុជាបញ្ជូនមកពីប្រទេសថៃសរុបចំនួន ៧៤,១៤៨នាក់ (បុរស៣០,៤៥៩នាក់, ស្ត្រី ៣០,២៩៨នាក់,កុមារា ៩,០៧៧នាក់,កុមារី ៤,៣១៤នាក់) ។ ក្នុងចំណោម ពលករ–ពលការិនី កម្ពុជាដែលបានបញ្ជូនមកពីប្រទេសថៃទាំង ៧៤,១៤៨នាក់ ក្នុងនោះរួមមាន ៖ ច្រកអូរបីជាន់ មានចំនួន ៣៧,៣២៣នាក់, ច្រកម៉ាឡៃ ៩,៥១២នាក់, ច្រកបឹងត្រកួន ១,៩៧០នាក់, ច្រកប៉ោយប៉ែត ២៥,៤៤៣នាក់។
លើកឡើងក្នុងវគ្គបណ្តុះបណ្តាលខាងលើ ឯកឧត្តម ឈួរ សុបញ្ញា ប្រតិភូរាជរដ្ឋាភិបាល ទទួលបន្ទុក ជាអគ្គនាយក នៃមូលនិធិជាតិជំនួយសង្គម បានលើកឡើងថា គ្រប់អ្នកពាក់ព័ន្ធ ត្រូវរួមសហការគ្នា ចុះអបរំ ផ្សព្វផ្សាយដល់ពលរដ្ឋ ឲ្យបានយល់ច្បាស់ ពីហានីភ័យ នៃការឆ្លងដែនដោយខុសច្បាប់ ។ បច្ចុប្បន្ន ពលរដ្ឋបានធ្វេីចំណាកស្រុក ដោយខុសច្បាប់ មានជាបន្តបន្ទាប់ ដោយសារតែ មានការអូសទាញ ពីសំណាកមេខ្យល់ នាំទៅប្រទេសថៃ ដេីម្បីរកការងារ ។ ជាមួយគ្នាក៏បានភាគីថៃ បញ្ជូនត្រលប់មកកម្ពុជាវិញជាបន្តបន្ទាប់ផងដែរ ។
ឯកឧត្តម ក៏បាន អរគុណ ចំពោះគ្រប់ភាគីពាក់ព័ន្ធ អង្គការដៃគូរ ដែលកន្លងមកបាន ខិតខំយ៉ាងសស្រាក់សស្រាំ ក្នុងការជួយសម្រួលដល់ពលករ ដែលត្រូវបានបញ្ជូនពីប្រទេសថៃ មកកម្ពុជា ដោយមានការរៀបចំអាហារហូបចុក និងសម្ភារៈផ្សេងៗហើយ ក៏បានអំពាវនាវដល់ថ្នាក់ដឹកនាំ អាជ្ញាធរមូលដ្ឋាន សមត្ថកិច្ចពាក់ព័ន្ធ និងអង្គការដៃគូនានា បន្តចូលរួមសហការគ្នា ក៏ដូចជាការជួយផ្តល់សេវានានាដែលចាំបាច់ ដល់ក្រុមគ្រួសារជនចំណាកស្រុក ជាពិសេសពលករចំណាកស្រុកទៅប្រទេសថៃ ដែលមិនមានសុវត្ថិភាព ដើម្បីចូលរួមការពារទប់ស្កាត់ ការលួចឆ្លងដែន ដោយខុសច្បាប់ ពីសំណាកពលរដ្ឋ ៕
