ព័ត៌មានជាតិ
ឯកឧត្តម ស សុខា អបអរសាទរឯកឧត្តម សុខ សូកាន ក្លាយជាប្រធានសហព័ន្ធកីឡាប៊ូល និងប៉េតង់កម្ពុជា
ភ្នំពេញ ៖ ឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា និងជាប្រធានសហព័ន្ធកីឡាប៊ូល និងប៉េតង់កម្ពុជា អាណត្តិទី៦ បានសម្តែងនូវការអបអរសាទរចំពោះឯកឧត្តម សុខ សូកាន ដែលទទួលបានការបោះឆ្នោតផ្តល់សេចក្ដីទុកចិត្តជាប្រធានសហព័ន្ធកីឡាប៊ូល និងប៉េតង់កម្ពុជា សម្រាប់អាណត្តិឆ្នាំ ២០២១-២០២៥ ក្នុងមហាសន្និបាតវិសាមញ្ញអាណត្តិទី៧ និងការបោះឆ្នោតជ្រើសរើសប្រធាន និងសមាជិកគណៈកម្មាធិការប្រតិបត្តិ ក្រោមអធិបតីភាព ឯកឧត្ដម ស សុខា កាលពីរសៀលថ្ងៃទី២០ ខែកក្កដា ឆ្នាំ២០២២ នៅមជ្ឈមណ្ឌលជាតិហ្វឹកហ្វឺនកីឡា ។
ថ្លែងក្នុងពិធីនោះ ឯកឧត្តម ស សុខា បានបញ្ជាក់ថា ដោយឯកឧត្តមមើលឃើញថាគណៈកម្មាធិការប្រតិបត្តិ និងក្រុមការងាររបស់សហព័ន្ធកីឡាប៊ូលនិងប៉េតង់កម្ពុជា ក្នុងនោះមានឯកឧត្តម សុខ សប្បាយណា ជាអគ្គលេខាធិការសហព័ន្ធ មានសកម្មភាពផុលផុស រឹងមាំ ព្រមទាំងបន្តបង្ហាញកេរ្តិ៍ឈ្មោះ និងបោះសម្លេងលើឆាកអន្តរជាតិ គួរជាទីមោទនៈ ប្រកបដោយម្ចាស់ការ និងការទទួលខុសត្រូវ។
ឯកឧត្តម ស សុខា បានបន្តថា កត្តានេះធ្វើឱ្យឯកឧត្តមមានទំនុកចិត្តយកឱកាសដកឃ្លាទៅជួយដល់សហព័ន្ធកីឡាផ្សេងៗ និងជាពិសេសសហព័ន្ធកីឡាសិស្សនិស្សិត និងសហព័ន្ធកីឡាបាល់ទះកម្ពុជា ជាដើម ដើម្បីត្រៀមខ្លួនទៅកាន់ស៊ីហ្គេមឆ្នាំ២០២៣ ខាងមុខ ដែលកម្ពុជាយើងធ្វើជាម្ចាស់ផ្ទះ។
តាមពិតទៅសហព័ន្ធត្រូវរៀបចំការបោះឆ្នោតជ្រើសតាំងប្រធាន និងគណ:កម្មាធិការប្រតិបត្តិនៃសហព័ន្ធកីឡាប៊ូលនិងប៉េតង់កម្ពុជា សម្រាប់អាណត្តិឆ្នាំ២០២១-២០២៥ តាំងពីឆ្នាំ២០២ មកម្លេះ ប៉ុន្តែដោយសារស្ថានភាពកូវីដ-១៩ រាតត្បាតខ្លាំង និងម៉្យាងដោយសារតែកៀកនឹងព្រឹត្តិការណ៍កីឡាស៊ីហ្គេមលើកទី៣១ នៅប្រទេសវៀតណាមផង ទើបធ្វើឱ្យលើកពេលមកដល់ថ្ងៃនេះតែម្តង។
ឯកឧត្តម ស សុខា បានគូសនញ្ជាក់ដែរថា ទន្ទឹមនេះសម្រាប់ខ្ញុំនៅតែបន្តធ្វើដំណើរឆ្ពោះទៅមុខជាមួយបងប្អូនអ្នកគាំទ្រកីឡាករ គ្រូបង្វឹក និង គណៈកម្មាធិការប្រតិបត្តិដដែល ដោយកាន់តួនាទីជាប្រធានកិត្តិយសរបស់សហព័ន្ធកីឡាប៊ូលនិងប៉េតង់កម្ពុជា តាមរយ:ការបោះឆ្នោតផ្ដល់សេចក្ដីទុកចិត្តពីមហាសន្និបាតវិសាមញ្ញនារសៀលនេះ។ យើងរួមគ្នា បន្តដំណើរទៅដណ្ដើមយកមេដាយមាស នាស៊ីហ្គេមឆ្នាំ២០២៣ ខាងមុខ ឱ្យបានដាច់ខាត៕
