បុរសម្នាក់ ត្រូវបានរថភ្លើងបុកនិងកិន បណ្តាលអោយស្លាប់យ៉ាងអាណោចអាធ័ម

បាត់ដំបង ៖ បុរសម្នាក់ដែលគេស្គាល់ថា ជាមនុស្សវិបល្លះស្មារតី ត្រូវបានរថភ្លើងបុកនិងកិន បណ្តាលអោយស្លាប់យ៉ាងអាណោចអាធ័ម បង្កការភ្ញាក់ផ្អើលនៅវេលាម៉ោង ០៨និង០០នាទីព្រឹក ថ្ងៃទី០៧ ខែមករា ឆ្នាំ២០២៥ នៅចំណុចលូ៦ ស្ថិតក្នុងភូមិអូរស្រឡៅ ឃុំអូរដំបង១ ស្រុកសង្កែ ខេត្តបាត់ដំបង។

ម្តាយជនរងគ្រោះ បានបញ្ជាក់ថា ជនរងគ្រោះឈ្មោះ ផ្លុង សាវឿន ហៅ ប្លែក ភេទប្រុស អាយុ២៨ឆ្នាំ និងជាជនមានវិបល្លះស្មារតី រស់នៅក្រុមទី១ ភូមិអូរស្រឡៅ ឃុំអូរដំបង១ ស្រុកសង្កែ ខេត្តបាត់ដំបង ដែលជនរងគ្រោះតែងតែដើរចេញពីផ្ទះរហូត ហើយចុងក្រោយនេះបានបាត់ចេញពីផ្ទះរយះពេលបីថ្ងៃទោះដើររកក៏រកមិនឃើញ រហូតទៅព្រឹក ថ្ងៃទី០៧ ខែមករា ឆ្នាំ២០២៥ ក៏ទទួលបានព័ត៌មានថា កូនប្រុសរបស់គាត់ត្រូវបានរថភ្លើងបុកស្លាប់បាត់ហើយ។

ក្រោយពេលកើតហេតុសមត្ថកិច្ចមូលដ្ឋានបានចុះទៅពិនិត្យនិងធ្វើកំណត់ហេតុប្រគល់សពជនរងគ្រោះអោយក្រុមគ្រួសារយកទៅរៀបចំធ្វើបុណ្យតាមប្រពៃណី ៕

ដោយ ៖ សាលី