សង្ស័យរថយន្តបែកកង់មុខ រ៉េចង្កូតទៅបុកម៉ូតូពេញទំហឹង បណ្តាលអោយឪពុកកូន០២នាក់ រងរបួសធ្ងន់

បាត់ដំបង ៖ បុរសជាឪពុកនិងកូនស្រីម្នាក់បានរងរបួសធ្ងន់ ក្រោយជួបឧបទ្ទវហេតុគ្រោះថ្នាក់ចរាចរណ៍នៅវេលាម៉ោង ១៨និង២៦នាទី ថ្ងៃទី២៨ ខែធ្នូ ឆ្នាំ២០២៤ នៅត្រង់ចំណុចក្រុមទី០៧ ស្ថិតក្នុងភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង ។

ប្រជាពលរដ្ឋនៅកន្លែងកើតហេតុបានប្រាប់ថា ករណីគ្រោះថ្នាក់ចរាចរណ៍ខាងលើនេះដែរបានកើតឡើងរវាងម៉ូតូម៉ាកហុងដាឌ្រីម ពណ៌ខ្មៅ ពាក់ផ្លាកលេខ បាត់ដំបង 1N-6578 បើកបរដោយឈ្មោះ គង់ ឈួម ភេទប្រុស អាយុ ៤២ឆ្នាំ នៅភូមិកំពង់ពិល ឃុំវត្តតាមិម ស្រុកសង្កែ ខេត្តបាត់ដំបង និងកូនស្រីឈ្មោះ ម៉ុន ស្រីពេជ្រ អាយុ០៣ឆ្នាំ ទិសដៅពីលិចទៅកើត ចំណែករថយន្តម៉ាក TOYOTA  SURF ពណ៌ខៀវចាស់ ពាក់ផ្លាកលេខ បាត់ដំបង 2A-4139 បើកបរដោយឈ្មោះ ឈុន ផាន់ណា ភេទប្រុស អាយុ៤២ឆ្នាំ រស់នៅភូមិកំពង់ឆ្លង ឃុំវត្តតាមិម ស្រុកសង្កែ ខេត្តបាត់ដំបង ទិសដៅពីកើតទៅលិច លុះមកដល់ចំណុចកើតហេតុខាងលើ សង្ស័យបែកកង់មុខខាងឆ្វេង ក៏បានរ៉េចង្កូតទៅបុកម៉ូតូពេញទំហឹង បណ្តាលអោយរឪពុកនិងកូនរងរបួសធ្ងន់ និងបន្តទៅបុកចូលរោងជាងជួសជុលម៉ូតូផងដែរ ។

ក្រោយពេលកើតហេតុជនរងគ្រោះត្រូវបានដឹកទៅសង្រ្គោះព្យាបាលភ្លាមៗនៅមន្ទីរពេទ្យចំណែកមធ្យោបាយទាំង០២គ្រឿងត្រូវបានកម្លាំងនគរបាលចរាចរណ៍មកវាស់វែងយកទៅរក្សាទុកដើម្បីរងចាំដោះស្រាយតាមផ្លូវច្បាប់ ៕

ដោយ ៖ សាលី