ដកហូតកាំភ្លើងកែច្នៃ កាំបិត និងថ្នាំញៀនមួយចំនួន ក្រោយឃាត់ខ្លួនជនសង្ស័យ ០៣នាក់

បាត់ដំបង ៖ កម្លាំងការិយាល័យជំនាញ នៃទីបញ្ជាការកងរាជអាវុធហត្ថខេត្តបាត់ដំបង បានធ្វើការឃាត់ខ្លួនជនសង្ស័យចំនួន០៣នាក់ នៅក្នុងរង្វង់ប្រតិបត្តិការបង្ក្រាបករណីជួញដូរដោយខុសច្បាប់នូវសាធាតុញៀន០១លើក ដកហូតកាំភ្លើងកែច្នៃ កាំបិត និងថ្នាំញៀនមួយចំនួន។

ប្រតិបត្តិការខាងលើ ធ្វើឡើងកាលពីវេលាម៉ោង ១២ និង១០នាទី ថ្ងៃទី១៧ ខែធ្នូ ឆ្នាំ២០២៤ នៅចំណុចភូមិដំណាក់ហ្លួង សង្កាត់វត្តគរ ក្រុងបាត់ដំបង ដោយបានធ្វើការឃាត់ខ្លួនជនសង្ស័យចំនួន ០៣នាក់ ៖ ១.ឈ្មោះ ណុប ណារុធ ភេទប្រុស អាយុ ៥៥ឆ្នាំ មុខរបរកម្មករ, ២.ឈ្មោះ យឹម សំណាង ភេទប្រុស អាយុ៣៧ឆ្នាំ មុខរបរកម្មករ, ៣.ឈ្មោះ ប៊ូ សារុន ភេទប្រុស អាយុ៣៩ឆ្នាំ មុខរបរកម្មករ ទាំងបីនាក់រស់នៅភូមិដំណាក់ហ្លួង សង្កាត់វត្តគរ ក្រុងបាត់ដំបង។

ជាមួយកិច្ចប្រតិបត្តិការខាងលើនេះ សមត្ថកិច្ចជំនាញបានដកហូតវត្ថុតាងរួមមាន ៖ គ្រឿងញៀនម្សៅក្រាមពណ៌សថ្លា (ice) ចំនួន ០៣កញ្ចប់ ទម្ងន់ ១.៣៩ក្រាម ( ទាំងសំបក ) ,កាំភ្លើងកែច្នៃ កាំភ្លើងខ្យល់ ចំនួន០៤ដើម ,កាំបិត ចំនួន ០២ដើម ,ទូរស័ព្ទ ០៣គ្រឿង ,ឧបករណ៍ប្រើប្រាស់គ្រឿងញៀនចំនួន០៣ ,និងថង់សម្រាប់វេចខ្ចប់គ្រឿងញៀនមួយចំនួន។

បច្ចុប្បន្ន ជនសង្ស័យនិងវត្ថុតាង កំពុងឃាត់ខ្លួននៅការិយាល័យជំនាញ ដើម្បីកសាងសំណុំរឿងបញ្ជូនទៅតុលាការចាត់ការបន្តតាមនិតិវិធី ៕

ដោយ ៖ សាលី