ករណីឃាតកម្មវាយសម្លាប់ប្រពន្ធ ត្រូវសមត្ថកិច្ចឃាត់ខ្លួនជនដៃដល់ជាប្តីចុង

បាត់ដំបង ៖ បុរសជាជនសង្ស័យម្នាក់ ត្រូវបានកម្លាំងនៃអធិការដ្ឋាននគរបាលស្រុកបាណន់ សហការជាមួយកម្លាំងប៉ុស្តិ៍នគរបាលរដ្ឋបាលតាគ្រាម ចុះប្រតិបត្តិការឃាត់ខ្លួនភ្លាមៗក្រោយសង្ស័យថាបានធ្វើសកម្មភាពដោយយកដំបងឬស្សីវាយប្រហារទៅលើរាងកាយប្រពន្ធចុងរហូតស្លាប់បាត់បង់ជីវិតនៅនឹងកន្លែង។

សមត្ថកិច្ចបានបញ្ជាក់ថា ករណីឃាតកម្មខាងលើនេះបានបង្កការភ្ញាក់ផ្អើលនៅវេលាម៉ោង ០៦និង០០នាទីព្រឹក ថ្ងៃទី១៧ ខែធ្នូ ឆ្នាំ២០២៤ នៅចំណុចផ្លូវវាលស្រែក្បែស្រះទឹកមួយកន្លែង ស្ថិតក្នុងភូមិតាគ្រាម ឃុំតាគ្រាម ស្រុកបាណន់ ខេត្តបាត់ដំបង ។

សមត្ថកិច្ចបានបញ្ជាក់បន្ថែមថា ជនសង្ស័យ ឈ្មោះ ផល​ ភារម្យ ភេទប្រុស អាយុ​ ៤១ឆ្នាំ ជាមនុស្សញៀនស្រាជាប្រចាំរស់នៅភូមិថ្មី​ ឃុំតាគ្រាម​ ស្រុកបាណន់​  ខេត្តបាត់ដំបង ដែលជនសង្ស័យខាងលើបានធ្វើសកម្មភាពដោយយកជើងជាន់ករនិងដំបងឬស្សីវាយទៅលើប្រពន្ធចុង ឈ្មោះ ផៃ ទូច អាយុ ៣៨ឆ្នាំ បណ្តាលឲ្យស្លាប់នៅកន្លែងកើតហេតុព្រោះតែប្រច័ណ្ឌប្រពន្ធ  ។

ក្រោយពីឃាត់ខ្លួនជនសង្ស័យត្រូវបានកម្លាំងជំនាញអធិការស្រុកកំពុងកសាងសំណុំរឿងដើម្បីចាត់ការតាមនិតិវិធី ៕

ដោយ ៖ សាលី