ឃាត់ខ្លួនជនសង្ស័យ០២នាក់ ពីបទ រក្សាទុកគ្រឿងញៀន

បាត់ដំបង ៖ កម្លាំងផ្នែកប្រឆាំងគ្រឿងញៀន សហការជាមួយកម្លាំងប៉ុស្តិ៍នគរបាលរដ្ឋបាលអូររំដួលនិងកម្លាំងប៉ុស្តិ៍នគរបាលរដ្ឋបាលភ្នំព្រឹក នៃអធិការដ្ឋាននគរបាលស្រុកភ្នំព្រឹក បានចុះធ្វើការល្បាតនិងបង្ក្រាបបានករណីរក្សាទុកដោយខុសច្បាប់នូវសារធាតុញៀន០១ករណីក្នុងបទល្មើសជាក់ស្តែង។

កិច្ចប្រតិបត្តិការខាងលើនេះបានធ្វើឡើងនៅវេលាម៉ោង ១០និង១០នាទី ថ្ងៃទី១៣ ខែធ្នូ ឆ្នាំ២០២៤ នៅចំណុចភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបង ដោយបានឃាត់ខ្លួនជនសង្ស័យចំនួន០២នាក់  ដែលម្នាក់ឈ្មោះ គុណ រក្សា ហៅ (ម៉ន)ភេទប្រុស អាយុ២៩ឆ្នាំ រស់នៅភូមិបេងស្អាត ឃុំភ្នំព្រឹក ស្រុកភ្នំព្រឹក ខេត្តបាត់ដំបង និងម្នាក់ទៀតឈ្មោះ ឡុង ទូឈៀ ហៅ(ឈៀ) ភេទប្រុស អាយុ២៩ឆ្នាំ រស់នៅភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបង។

  វត្តុតាងចាប់យកបានរួមមាន៖ ម្សៅក្រាមពណ៌សថ្លាសច្រកក្នុងថង់ពណ៌សថ្លាចំនួន០២ថង់សង្ស័យមានសារធាតុញៀន ,ម៉ូតូចំនួន០២គ្រឿង ,ទូរស័ព្ទដៃចំនួន០២គ្រឿង ហើយបន្ទាប់មកក្រោយទទួលបានគោលការណ៍ពីឯកឧត្តម កែវ សុជាតិ ព្រះរាជអាជ្ញាអមសាលាដំបូងខេត្តបាត់ដំបង នៅថ្ងៃដដែលសមត្ថកិច្ចបានបន្តធ្វើការឆែកឆេរលំនៅដ្ឋានរបស់ជនសង្ស័យឈ្មោះ ឡុង ទូឈៀ ហៅ(ឈៀ) រកឃើញ.ម្សៅក្រាមពណ៌សថ្លាច្រកក្នុងថង់ប្លាស្ទិកសថ្លាចំនួន០៣ថង់សង្ស័យមានសារធាតុញៀន , ជញ្ជីងសម្រាប់ថ្លឹងថ្នាំញៀនចំនួន០១គ្រឿង ,ព្រមទាំងសម្ភារ:សម្រាប់ប្រើប្រាស់ និងវេចខ្ចប់គ្រឿងញៀនមួយចំនួនផងដែរ ៕

ដោយ ៖ សាលី