យុវជនម្នាក់រងរបួសបាក់ភ្លៅម្ខាង ក្រោយជិះម៉ូតូសណ្តោងរ៉ឺម៉ក ទៅបុករថយន្តដែលកំពុងបត់ឆ្លងផ្លូវ

បាត់ដំបង  ៖ យុវជនម្នាក់បានរងរបួសធ្ងន់បាក់ភ្លៅម្ខាងក្រោយជួបឧបទ្ទវហេតុគ្រោះថ្នាក់ចរាចរណ៍នៅវេលាម៉ោង ១១និង៣០នាទី ថ្ងៃទី១១ ខែធ្នូ ឆ្នាំ២០២៤ នៅតាមបណ្តោយផ្លូវជាតិលេខ៥ ត្រង់ចំណុចផ្លូវចូលផ្សារ ភួ ពុយ ស្ថិតក្នុងភូមិអញ្ចាញ សង្កាត់អូរចារ ក្រុងបាត់ដំបង។

ប្រភពនៅកន្លែងកើតហេតុបានប្រាប់ថា ករណីគ្រោះថ្នាក់ចរាចរណ៍ខាងលើនេះដែរបានកើតឡើងរវាងរថយន្តម៉ាក LEXUS .RX330ពណ៌សមួយគ្រឿង ពាក់ផ្លាកលេខ បាត់ដំបង 2B-7411 បើកបរដោយស្ត្រីវ័យក្មេងម្នាក់ ក្នុងទិសដៅពីលិចទៅកើត លុះមកដល់ចំណុចកើតហេតុខាងលើបានបត់ឆ្វេងឆ្លងផ្លូវចូលផ្សារ ចំណែកម៉ូតូសណ្តោងរ៉ឺម៉កម៉ាកហុងដាឌ្រីមពណ៌ខ្មៅ ពាក់ផ្លាកលេខ បាត់ដំបង1D-7886 បើកបរដោយយុវជនម្នាក់ដឹកធុងហ្គាសពេញ ធ្វើដំណើរទិសដៅពីកើតទៅលិច បានជ្រុលចង្កូតទៅបុកពេញទំហឹងបណ្តាលអោយរងរបួសធ្ងន់បាក់ភ្លៅឆ្វេងម្ខាងតែម្តង។

ក្រោយពេលកើតហេតុសមត្ថកិច្ចជំនាញបានចុះទៅដឹកជនរងគ្រោះទៅសង្រ្គោះព្យាបាលនៅមន្ទីរពេទ្យ បន្ទាប់មកបានវាស់វែងធ្វើកំណត់ហេតុយកមធ្យោបាយទាំងពីរទៅរក្សាទុកនៅការិយាល័យជំនាញដើម្បីចាត់ការតាមនីតិវិធីច្បាប់ ៕

ដោយ ៖ សាលី