ក្រុមហ៊ុន២ រួមគ្នាអភិវឌ្ឍន៍សួនថាមពលកកើតឡើងវិញ ទីធ្លាបៃតង និងតំបន់ឧស្សាហកម្មដែលមិនប៉ះពាល់ដល់បរិស្ថាន នៅក្នុងទីក្រុងឧស្សាហកម្ម បៃតងតេជោភ្នំឆ័ត្រ

បន្ទាយមានជ័យ ៖ ក្រុមហ៊ុនចិននិងខ្មែរចំនួន២ រួមមាន ក្រុមហ៊ុន អេឌី អាក អ៊ិនដាសស្ទៀល ផាក ឯ.ក និងក្រុមហ៊ុន ខេមរិន (ខេមបូឌា) ឌីវេឡុបម៉ិន បានចុះអនុស្សរណៈយោគយល់គ្នា ជាផ្លូវការនូវការបង្កើត ក្រុមហ៊ុនបណ្តាក់ទុនរួមគ្នារវាងភាគីពាក់ព័ន្ធ។

ការចុះអនុស្សរណៈយោគយល់គ្នា (MOU) ធ្វេីឡេីងកាលពីថ្ងៃទី០៩ ខែធ្នូ ឆ្នាំ ២០២៤នៅសាលាខេត្តបន្ទាយមានជ័យ ក្រោមអធិបតីភាពលោក អ៊ុំ រាត្រី អភិបាលខេត្តបន្ទាយមានជ័យ ។

តាមការលើកឡើងរបស់លោកសេង ស៊ីណារិន ទីប្រឹក្សាក្រុមហ៊ុន ខេមរិន (ខេមបូឌា) ឌីវេឡុបម៉ិនបានបញ្ជាក់ការបណ្តាក់ទុនរួមគ្នានេះនឹងបែងចែកធនធានហិរញ្ញវត្ថុ បច្ចេកវិទ្យា និងជំនាញវិស្វកម្មឧស្សាហកម្ម ដើម្បីបង្កើតផែនការមេដ៏ទូលំទូលាយសម្រាប់សួនថាមពលកកើតឡើងវិញ និងការអភិវឌ្ឍន៍ឧស្សាហកម្ម ដោយធានាបាននូវបរិស្ថានទីក្រុង និងផែនការឧស្សាហកម្មដែលមានរចនាសម្ព័ន្ធល្អ ស្របតាមគោលការណ៍ និរន្តរភាព និងគោលដៅអភិវឌ្ឍន៍ប្រកបដោយចីរភាព (SDGs)។ មួយវិញទៀត កិច្ចសហប្រតិបត្តិការគ្នារវាងក្រមហ៊ុនទាំងពីរ ផ្តោតលើការអភិវឌ្ឍន៍ឧស្យានថាមពលបៃតងស្អាត និងទីក្រុងឧស្សាហកម្មបៃតងតេជោភ្នំឆ័ត្រ ដែលមានទីតាំងនៅភូមិភ្នំឆ័ត្រ ឃុំស្វាយចេក ស្រុកស្វាយចេក ខេត្តបន្ទាយមានជ័យ។

តាមលោក អ៊ុំ រាត្រី អភិបាលនៃគណៈអភិបាលខេត្ត ក៏បានថ្លែងនូវការសាទរ និងគាំទ្រយ៉ាងពេញទំហឹង ចំពោះក្រុមហ៊ុនទាំងពីរត្រូវបានចាប់ដៃគូគ្នាក្នុងការអភិវឌ្ឍន៍ឧស្យានថាមពលបៃតងស្អាត និងទីក្រុងឧស្សាហកម្មបៃតងតេជោភ្នំឆ័ត្រ ដើម្បីបង្កើនឱកាសការងារដល់ប្រជាពលរដ្ឋនៅក្នុងមូលដ្ឋានមានការងារធ្វើ កាត់បន្ថយការចំណាកស្រុក។ ជាពិសេសជួយដល់កសិករដែលកំពុងតែ ដែលដាំដំឡូងមី មានទីផ្សារក្នុងការផលិតនិងកែច្នៃនៅក្នុងស្រុក។

សូមបញ្ជាក់ថា គ្រោងការនេះមានគោលបំណងបង្កើតទីក្រុងឧស្សាហកម្មបៃតងទំនើប ជាមួយនឹងហេដ្ឋារចនាសម្ព័ន្ធទាន់សម័យ ដើម្បីលើកកម្ពស់ការអភិវឌ្ឍន៍ប្រកបដោយចីរភាព កំណើនសេដ្ឋកិច្ច និង បរិយាកាសរស់នៅប្រកបដោយគុណភាពខ្ពស់។ ធាតុសំខាន់ៗនៃទីក្រុងឧស្សាហកម្មនេះរួមមាន ៖ រោងចក្រថាមពលបៃតង: ផ្តោតលើការប្រើប្រាស់ប្រភពថាមពលដែលមានស្រាប់ពីធម្មជាតិដូចជា ប្រភពថាមពលពីពន្លឺព្រះអាទិត្យ ខ្យល់ និងប្រព័ន្ធផ្ទុកថាមពលថ្ម (BESS) ដើម្បីបង្កើតប្រព័ន្ធអេកូ ថាមពលដ៏រឹងមាំ, សំណង់ឧស្សាហកម្ម បង្កើត និងពង្រីករោងចក្រផលិត និងតំបន់ឧស្សាហកម្ម ដើម្បីទាក់ទាញការវិនិយោគ បង្កើតឱកាសការងារ និងជំរុញខ្សែចង្វាក់ផលិតទំនិញ និងសេវាកម្ម, តំបន់ស្នាក់នៅ ផែនការស្នាក់នៅ និងតំបន់រស់នៅដែលមានការគិតគូរល្អ ដើម្បីផ្តល់ការស្នាក់នៅ ដែលមានផាសុខភាព និងងាយស្រួលសម្រាប់កម្មករ និងប្រជាជនក្នុងទីក្រុង, ហេដ្ឋារចនាសម្ព័ន្ធគាំទ្រ និងសេវាកម្មរដ្ឋបាល ស្ថាបនាហេដ្ឋារចនាសម្ព័ន្ធចាំបាច់មួយចំនួនរួមមាន ផ្លូវថ្នល់ សេវាកម្មសាធារណៈ និងសេវាកម្មរដ្ឋបាល ដើម្បីធានាការគ្រប់គ្រងទីក្រុងមានប្រសិទ្ធភាព។

អនុស្សរណៈយោគយល់គ្នានេះនឹងមានសុពលភាពក្នុងរយៈពេលដំបូងចំនួនប្រាំ (០៥) ឆ្នាំ ចាប់ពីថ្ងៃទី០៩ ខែធ្នូ ឆ្នាំ២០២៤ លុះត្រាតែត្រូវបានបញ្ចប់មុនដោយភាគីណាមួយស្របតាមការកំណត់ក្នុងចំណុចបញ្ចប់៕