ឃាត់ខ្លួនជនសង្ស័យប្រុសស្រី០៣នាក់ ជាប់ពាក់ព័ន្ធពីបទលួច ទទួលផលចោរកម្ម និងរក្សាទុកដោយខុសច្បាប់នូវសារធាតុញៀន

បាត់ដំបង ៖ កម្លាំងមូលដ្ឋានកងរាជអាវុធហត្ថស្រុកភ្នំព្រឹក ចុះធ្វើការស្រាវជ្រាវរហូតឈានដល់ឃាត់ខ្លួនបានជនសង្ស័យប្រុសស្រីចំនួន០៣នាក់ជាបន្តបន្ទាប់ជាប់ពាក់ព័ន្ធពីបទលួច ទទួលផលចោរកម្ម និងរក្សាទុកដោយខុសច្បាប់នូវសារធាតុញៀន។

កិច្ចប្រតិបត្តិការខាងលើនេះធ្វើឡើងកាលពីថ្ងៃ០៨ ខែធ្នូ ឆ្នាំ២០២៤ នៅចំណុចភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ដោយបានឃាត់ខ្លួនជនសង្ស័យចំនួន ០២នាក់ ០១/ ឈ្មោះ ហ៊ុន ស្រស់ ភេទប្រុស អាយុ ៣១ឆ្នាំ មុខរបររត់ម៉ូតូឌុប រស់នៅភូមិដំណាក់បេង ឃុំបួរ ស្រុកភ្នំព្រឹក ខេត្តបាត់ដំបង ០២/ ឈ្មោះ សុខ នឿន ហៅ ម៉ាប់ ភេទប្រុស អាយុ ៤១ឆ្នាំ មុខរបរកម្មករ រស់នៅភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ដែលជនសង្ស័យទាំងពីរនាក់បានជួលបន្ទប់ផ្ទះសំណាក់ពេជ្រចិន្តាធ្វើសកម្មភាពលួចយកម៉ូតូម៉ាកហុងដាឌ្រីម០១គ្រឿងរបស់ឈ្មោះ ណន វីរ: ភេទប្រុស អាយុ ២៤ឆ្នាំ មុខរបរកសិករ រស់នៅភូមិសាមគ្គី ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ។

ក្រោយពីឃាត់ខ្លួនសមត្ថកិច្ចដកហូតបាន វត្ថុតាង ,ម៉ូតូ Xcenter ០១គ្រឿង ,គ្រឿងញៀនប្រភេទម្សៅក្រាមម៉ាទឹកកក ( Ice ) ទម្ងន់ ០.៥៥ក្រាម ,ទូរស័ព្ទដៃ ០២គ្រឿង ,ប្រដាប់កាច់សោរម៉ូតូ០២ , សោរខ្សៀ ០១ និងប្រដាប់ប្រើប្រាស់គ្រឿងញៀនមួយចំនួន បន្ទាប់មកក៏បានបន្តធ្វើការឃាត់ខ្លួនជនសង្ស័ុយម្នាក់ទៀត ឈ្មោះ ស្មៀន សេរីសុគន្ធា ហៅនួន ភេទស្រី អាយុ ៣៤ឆ្នាំ មុខរបរកម្មករ នៅត្រង់ចំណុចភូមិអូរក្រូច ឃុំបឹងរាំង ស្រុកកំរៀង ខេត្តបាត់ដំបង ពាក់ព័ន្ធអ្នកទទួលផលចោរកម្ម រួមជាមួយវត្វុតាងម៉ូតូហុងដាឌ្រីម ០១គ្រឿង និងទួរស័ព្ទ០១គ្រឿងផងដែរ ៕

ដោយ ៖ សាលី