រថយន្តដឹកទំនិញធុនធំ បុកម៉ូតូសណ្តោងរ៉ឺម៉ក ពីក្រោយបណ្តាលអោយប្តីប្រពន្ធពីរនាក់ រងរបួសធ្ងន់ស្រាល

បាត់ដំបង ៖ ប្តីប្រពន្ធពីរនាក់ បានរងរបួសធ្ងន់ស្រាលក្រោយជួបឧបទ្ទវហេតុគ្រោះថ្នាក់ចរាចរណ៍ នៅវេលាម៉ោង១១និង០០នាទី ថ្ងៃទី០៤ ខែធ្នូ ឆ្នាំ២០២៤ នៅតាមបណ្តោយផ្លូវជាតិលេខ៥ (ហៃវេ)ស្ថិតក្នុងភូមិអូរតាគី ឃុំអូរតាគី ស្រុកថ្មគោល ខេត្តបាត់ដំបង។

ប្រភពនៅកន្លែងកើតហេតុ បានប្រាប់ថា ករណីគ្រោះថ្នាក់ចរាចរណ៍ខាងលើនេះ បានកើតឡើងរវាងម៉ូតូសណ្តោងរ៉ឺម៉កដឹកពងទារមួយគ្រឿង បើកបរដោយបុរសម្នាក់ និងអ្នករួមដំណើរជាប្រពន្ធម្នាក់ ទិសដៅពីជើងទៅត្បូង លុះមកដល់ចំណុចកើតហេតុ ក៏មានរថយន្តដឹកទំនិញធុនធំមួយគ្រឿង បើកបរដោយបុរសម្នាក់ទិសដៅស្របគ្នា បានជ្រុលចង្កូតទៅបុកពីក្រោយពេញទំហឹង បណ្តាលអោយទាំងម៉ូតូ និងរ៉ឺម៉កហោះឆ្លងប្រឡាយ អោយប្តីប្រពន្ធពីរនាក់រងរបួសធ្ងន់ស្រាលតែម្តង។

ក្រោយពេលកើតហេតុ សមត្ថកិច្ចជំនាញបានចុះទៅដឹកជនរងគ្រោះ ទៅសង្រ្គោះព្យាបាលនៅមន្ទីរពេទ្យ បន្ទាប់មកបានវាស់វែង ធ្វើកំណត់ហេតុ យកមធ្យោបាយទាំងពីរ ទៅរក្សាទុកដើម្បីចាត់ការតាមនីតិវិធីច្បាប់ ៕

ដោយ ៖ សាលី