រថយន្តដឹកទឹកកក បោះពួយយ៉ាងលឿន បុករថយន្តកុងតឺន័រកំពុងបត់ បណ្តាលអោយក្រឡាប់ និងរបួសមនុស្ស០៣នាក់

បាត់ដំបង ៖ គ្រោះថ្នាក់ចរាចរណ៍មួយ បានកើតឡើងរវាងរថយន្តដឹកទឹកកក ជាមួយនឹងរថយន្តកុងតឺន័រ បានបង្កការភ្ញាក់ផ្អើលនៅវេលាម៉ោង ២០និង០០យប់ ថ្ងៃទី ៣០ ខែតុលា ឆ្នាំ ២០២៤ នៅតាមបណ្តោយផ្លូវហាយវេ ស្ថិតក្នុងភូមិព្រៃទទឹង ឃុំជ្រៃ ស្រុកថ្មគោល ខេត្តបាត់ដំបង ។

ប្រភពកន្លែងកើតហេតុ បានប្រាប់ថា មុនពេលកើតហេតុគេឃើញរថយន្តកុងតឺន័រ ០១គ្រឿង ពាក់ផ្លាកលេខខាងមុខ ព្រះសីហនុ 3A-1352 និងកន្ទុយក្រោយពាក់ផ្លាកលេខ ភ្នំពេញ4A-6298 បានធ្វើដំណើរពីជើងទៅត្បូង លុះមកដល់ចំណុចកើតហេតុបានឆ្លងបកក្រោយ ភ្លាមនោះរថយន្តដឹកទឹកកកមង្គល ពណ៌ស ពាក់ផ្លាកលេខ បន្ទាយមានជ័យ 3A-1579 បើកបរក្នុងទិសដៅពីត្បូងទៅជើង ជ្រុលទៅបុកគ្នាពេញទំហឹង បណ្តាលអោយក្រឡាប់ផ្ងាជើង ខូចខាតយ៉ាងដំណំ និងមនុស្ស០៣នាក់ រងរបួសធ្ងន់ស្រាលផងដែរ។

ក្រោយកើតហេតុ ជនរងគ្រោះត្រូវបានដឹកបញ្ជូនទៅសង្គ្រោះព្យាបាលនៅមន្ទីរពេទ្យ ចំណែកមធ្យោបាយទាំងពីរ ត្រូវបានសមត្ថកិច្ចជំនាញ វាស់វែងធ្វើកំណត់ហេតុ យកទៅរក្សាទុកនៅការិយាល័យចរាចរណ៍រង់ចាំដោះស្រាយតាមនីតិវិធីច្បាប់ ៕

ដោយ ៖ សាលី