វ៉ាជែងមិនប្រយ័ត្ន ជ្រុលបុកម៉ូតូខាងមុខ បណ្តាលអោយមនុស្សម្នាក់រងរបួសធ្ងន់ និងម្នាក់ទៀត ស្លាប់ពេលបញ្ជូនទៅមន្ទីរពេទ្យ

បាត់ដំបង ៖ យ៉ាងហោចណាស់បុរសម្នាក់ បានរងរបួសធ្ងន់ និងស្ត្រីម្នាក់ស្លាប់ ពេលបញ្ជូនទៅមន្ទីរពេទ្យ ក្រោយជួបឧបទ្ទវហេតុគ្រោះថ្នាក់ចរាចរណ៍ នៅវេលាម៉ោង ១៧និង០០នាទី​ ថ្ងៃទី២៥ ខែកញ្ញា ឆ្នាំ២០២៤ នៅលើកំណាត់ផ្លូវជាតិលេខ៥៧B ស្ថិតក្នុងភូមិស្ពានទំនាប ឃុំអំពិល ស្រុកបវេល ខេត្តបាត់ដំបង ។

ប្រជាពលរដ្ឋ បានអោយដឹងថា ដំបូងគេឃើញម៉ូតូម៉ាកហុងដាឌ្រីមពណ៌ខ្មៅមួយគ្រឿង ពាក់ផ្លាកលេខ បាត់ដំបង 1H-3499 បើកបរដោយស្ត្រី០១នាក់ ទិសដៅពីកើតទៅលិច ចំណែកម៉ូតូ០១គ្រឿងទៀតម៉ាកហុងដាឌ្រីម ពណ៌ខ្មៅ ពាក់ផ្លាកលេខ បាត់ដំបង 1E-2494 បើកបរដោយបុរស០១នាក់ទិសដៅពីកើតទៅលិច លុះមកដល់ចំណុចកើតហេតុបានឡើងវ៉ាជែងរថយន្តខាងមុខក៏ជ្រុលចង្កូតទៅបុកគ្នាពេញទំហឹងបណ្តាលអោយម្នាក់រងរបួសធ្ងន់ និងម្នាក់ទៀតជាស្ត្រីស្លាប់តាមផ្លូវពេលបញ្ជូនទៅមន្ទីរពេទ្យ។

ក្រោយពេលកើតហេតុសមត្ថកិច្ចនគរបាលជំនាញបានមកវាស់វែង ធ្វើកំណត់ហេតុយកមធ្យោបាយទាំងពីរ ទៅរក្សាទុក ចំណែកសាកសពត្រូវបានប្រគល់អោយក្រុមគ្រួសារ យកទៅធ្វើបុណ្យតាមប្រពៃណី ៕

ដោយ ៖ សាលី