ពិធីចែករង្វាន់សិស្សជាប់ចំណាត់ថ្នាក់លេខ០១ ដល់លេខ០៥ នៃសាលាបឋមសិក្សាបោះពោធិ៍

បាត់ដំបង ៖ នៅព្រឹកថ្ងៃទី២៥ ខែកញ្ញា ឆ្នាំ២០២៤នេះ គណៈគ្រប់គ្រងសាលាបឋមសិក្សាបោះពោធិ៍ បានរៀបចំប្រារព្ធពិធីចែករង្វាន់សិស្សជាប់ចំណាត់ថ្នាក់លេខ១ ដល់លេខ៥ សរុបចំនួន៩០នាក់។

នៅក្នុងពិធីចែករង្វាន់សិស្ស ជាប់ចំណាត់ថ្នាក់នេះដែរ បន្ទាប់ពីលោក វឿន តុងហេង នាយកសាលាបឋមសិក្សាបោះពោធិ៍ឡើងរាយការណ៍ស្តីពីការសិក្សារបស់សិស្ស និងការអភិវឌ្ឍរីកចម្រើននៅក្នុងសាលារួចមក លោក កៅ ពិសិដ្ឋ សមាជិកក្រុមប្រឹក្សាឃុំ តំណាងដ៏ខ្ពង់ខ្ពស់លោក សេក ផានិត ដែលជាមេឃុំ បានមានប្រសាសន៍ថា រយៈពេលកន្លងមកយើងឃើញថា លោកគ្រូ អ្នកគ្រូ និង អាណាព្យាបាលលោកបានខិតខំខ្លាំងណាស់ដើម្បីកូនៗទាំងអស់គ្នា ហើយក្មុងនោះលោកក៏សង្កេតឃើញថា នៅក្នុងស្រុកសង្កែ មានតែឃុំអូរដំបង១យើងដែលរីកចម្រើនជាងគេ ដែលនេះជាកិត្តិយសមួយដែរសម្រាប់ឃុំយើង ក៏សម្រាប់លោកគ្រូ អ្នកគ្រូផងដែរ ដែលបានខិតខំប្រឹងប្រែងលះបង់កម្លាំងកាយចិត្តយកចំណេះវិជ្ជាទៅជូនបងប្អូន។

បន្ថែមពីនេះ លោកក៏បានស្នើដល់អាណាព្យាបាលជួយណែនាំជម្រុញកូនបន្ថែមក្នុងការរៀនអោយបានច្រើនកុំអោយពួកគាត់លេងទូរស័ព្ទច្រើន ជាពិសេសណែនាំកូនអោយជៀសឆ្ងាយពីគ្រឿងញៀនផងដែរ ៕

ដោយ ៖ សាលី