អាវុធហត្ថក្រុងប៉ោយប៉ែត ឃាត់ខ្លួនជនសង្ស័យម្នាក់ បញ្ជូនទៅតុលាការ ករណីជួញដូរគ្រឿងញៀន ៦០គ្រាប់

បន្ទាយមានជ័យ ៖ ជនសង្ស័យម្នាក់ ត្រូវបានកម្លាំងអាវុធហត្ថក្រុងប៉ោយប៉ែត ធ្វើការបង្ក្រាបឃាត់ខ្លួន និងបញ្ជូនជាបន្តបន្ទាប់ទៅសាលាដំបូងខេត្តបន្ទាយមានជ័យ ពាក់ព័ន្ធករណីជួញដូរ និងប្រើប្រាស់ដោយខុសច្បាប់នូវសារធាតុញៀន ។

លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលការងារស្រាវជ្រាវ និងបង្ក្រាបបទល្មេីស បានឱ្យដឹងថា ជនសង្ស័យខាងលើ មានឈ្មោះ បញ្ញា រិទ្ធ ភេទប្រុស អាយុ៤២ឆ្នាំ ត្រូវបានកម្លាំងអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ ជាមេបញ្ជាការក្រុង ធ្វើការបង្ក្រាបឃាត់ខ្លួនបាន កាលពីវេលាម៉ោង០៣និង០០នាទី  ថ្ងៃទី២៦ ខែសីហា ឆ្នាំ២០២៤ តាមការរាយការណ៍ ពីក្រុមសង្គ្រោះបឋមប្រចាំក្រុងប៉ោយប៉ែត និងបានដកហូតគ្រឿងញៀនប្រភេទ ថ្នាំគ្រាប់រាងមូលពណ៌ក្រហមក្បឿង (WY) ចំនួន ០១ថង់កិប ស្មើនឹង ៦០គ្រាប់ ទម្ងន់ ៦,៦៩ក្រាម ផងដែរ ។ 

ក្រោយឃាត់ខ្លួន និងសាកសួរ ជនសង្ស័យត្រូវបានកម្លាំងជំនាញ កសាងសំណុំរឿងបញ្ជូនទៅតុលាការកាលពីថ្ងៃទី២៧ ខែសីហា ឆ្នាំ២០២៤ ដើម្បីអនុវត្តតាមនីតិវិធី ៕