ឆ្លងចរន្តឆ្នាំងដាំបាយអគ្គីសនី ឆេះការ៉ាស់សាំងមួយកន្លែង បណ្តាលអោយបុរសម្នាក់ រងរបួសស្រាល

បាត់ដំបង ៖ ការ៉ាស់សាំងសូគីម៉ិចមួយកន្លែង ត្រូវបានអគ្គិភ័យឆាបឆេះ បង្កការភ្ញាក់ផ្អើលនៅវេលាម៉ោងប្រហែល ១៩និង៣០នាទីយប់ ថ្ងៃទី២១ ខែសីហា ឆ្នាំ២០២៤ ស្ថិតនៅចំណុចក្រុមទី១៣ ភូមិកសិកម្ម ឃុំតាពូង ស្រុកថ្មគោល ខេត្តបាត់ដំបង ។

សមត្ថកិច្ចបានបញ្ជាក់ថា ការ៉ាស់សាំង ដែលត្រូវអគ្គិភ័យឆាបឆេះខាងលើ ជារបស់ក្រុមហ៊ុនសូគីម៉ិច ដែលមានមេការឈ្មោះ រ៉ែន រ៉ាត់ ភេទប្រុស អាយុ ៣៥ឆ្នាំ រស់នៅភូមិកសិកម្ម ឃុំតាពូង ស្រុកថ្មគោល ខេត្តបាត់ដំបង ដែលផ្តើមឡើងដោយសារឆ្លងចរន្តឆ្នាំងដាំបាយអគ្គីសនី ទើបបណ្តាលអោយឆេះរាលដាលដល់ការ៉ាស់សាំង ឆេះចង្ក្រានហ្គាសឆ្នាំងដាំបាយ រួមជាមួយសម្ភារប្រើប្រាស់មួយចំនួន និងបណ្តាលអោយបុរសជាមេការឈ្មោះ រ៉ែន រ៉ាត់ រងរបួសស្រាល។

ក្នុងហេតុការណ៍គ្រោះអគ្គិភ័យខាងលើនេះដែរ ភ្លាមៗនោះ សមត្ថកិច្ចបានចេញរថយន្តពន្លត់អគ្គិភ័យចំនួន០១គ្រឿង ក្នុងការចុះអន្តរាគមន៍ពន្លត់ ដោយប្រើប្រាស់ទឹកអស់ចំនួន០១រថយន្ត ទើបគ្រប់គ្រងស្ថានភាពបានមិនអោយរាលដាលបន្តទៀត ៕

ដោយ ៖ សាលី