គយ​ និង​ពេទ្យសត្វ​ដុត​កម្ទេច​ចោល​នៅ​គ្រឿងក្នុង​សត្វ​ជ្រូក​ ជាង​កន្លះ​តោន ​នាំចូល​ខុសច្បាប់​ពី​ថៃ

54

បន្ទាយមានជ័យ​ ៖​ គ្រឿងក្នុង​សត្វ​ជ្រូក​ជាង​កន្លះ​តោន​នាំចូល​ខុសច្បាប់​ពី​ថៃ​ ត្រូវ​បាន​គយ​តំបន់៥ និង​ពេទ្យសត្វ​ ខេត្តបន្ទាយមានជ័យ​ ស្ទាក់​បង្ក្រាប​បាន​ ​ធ្វើការ​ដុត​​កម្ទេច​ចោល ថ្ងៃទី ២០ ខែ មករា ម្សិលមិញ​នេះ ​។

បើតាម​ការ​ឲ្យ​ដឹ​ងពី​លោក ហ៊ុយ ទូច​ ប្រធានការិយាល័យ​បសុពេទ្យ​ខេត្តបន្ទាយមានជ័យ​បាន​ឲ្យ​ដឹង​ថា ​ដោយមាន​ការ​សហការ​ល្អ​ជាមួយ​សមត្ថកិច្ច​គយ​ក្រុម​អន្តរាគមន៍ ​ការិយាល័យ ​សហការ​ជាមួយ​សមត្ថកិច្ច​គយ ​និង​រដ្ឋាករ ​នៃ​ការិយាល័យ​ស្រាវជ្រាវ ​និង​បង្ក្រាប​អំពើ​រត់ពន្ធ​តំបន់​៥ ​នៃ​អគ្គនាយក​ដ្ឋាន​គយ ​និង​រដ្ឋាករ​កម្ពុជា ​បានធ្វើការ​ស្ទាក់​​ចាប់​ផលិតផល​មាន​ដើមកំណើត​ពី​សត្វ​ជ្រូក​រួមមាន ​ពោះ​តាន់ សាច់ជ្រូក​៣​ជាន់​ និង​ពោះវៀន ​ចំនួន ៩​កេះ​ ស្មើនឹង ៥៤០ គីឡូក្រាម (១​កេះ​ស្មើនឹង ៦០​គីឡូក្រាម​) នៅ​ចំណុច​មុខ​ស្នាក់​ការ​គយ និង​រដ្ឋាករ ខាងលិច​ស្ពាន​ទឹកថ្លា​ ក្រុង​សិរីសោភ័ណ​ខេត្តបន្ទាយមានជ័យ​ ដែល​បង្កប់​ក្នុង​រថយន្ត​ដឹកទំនិញ​១​គ្រឿង ​។ បន្ទាប់ពី​ត្រួតពិនិត្យ​ជាក់​ស្តែង​រួចមក​ឃើញថា ​ផលិតផល​ទាំងនោះ ​បាន​ប្រែប្រួល​សភាព​ដើម ​មាន​ក្លិនស្អុយ (​រលាយ​ទឹកកក​អស់​) សមត្ថកិច្ច​ជំនាញ​ បាន​ក៏​ឯកភាពគ្នា​ធ្វើ​ការ​ដុត​កម្ទេច​ចោល​តាម​វិធានការ​បសុពេទ្យ ​ នៅ​ចំណុច​ភូមិ​ខ្លា​កូន​ សង្កាត់​កំពង់ស្វាយ ក្រុង​សិរីសោភ័ណ​ ខេត្តបន្ទាយមានជ័យ ​នៅវេលា​ម៉ោង ១២ រសៀល នា​ថ្ងៃខែ​ឆ្នាំ​ដដែល ​ដោយយោង​លើ​សារាចរ​លេខ ០៧ សរ របស់​ប្រមុខ​រាជរដ្ឋាភិបាល​កម្ពុជា ​ស្តីពី វិធាន​ការ​ទប់ស្កាត់​ការ​នាំចូល​ជ្រូក ​សាច់ជ្រូក ​និង​ផលិតផល​មាន​ដើមកំណើត​ពី​សត្វ​ជ្រូក​គ្រប់​ប្រភេទ​ដោយ​ខុសច្បាប់​ ចុះ​ថ្ងៃទី ៣១ ខែ កក្កដា ឆ្នាំ​២០១៩ ៕

ចំណែក