នគរបាលក្រុងបាត់ដំបង ឃាត់ខ្លួនជនសង្ស័យ០១នាក់ដកហូតថ្នាំញៀនជិត ២០០០គ្រាប់ និងកាំភ្លើង(ROLO) ១ដើម

បាត់ដំបង ៖ នគរបាលផ្នែកប្រឆាំងគ្រឿងញៀន សហការជាមួយក្រុមអន្តរាគមន៍នៃអធិការដ្ឋាននគរបាលក្រុងបាត់ដំបង បានចុះធ្វើការបង្ក្រាបករណី រក្សាទុក ដឹកជញ្ជូន ឬជួញដូរដោយខុសច្បាប់នូវសារធាតុញៀន០១ករណីក្នុងបទល្មើសជាក់ស្ដែង។

កិច្ចប្រតិបត្តិការខាងលើនេះធ្វើឡើងនៅវេលាម៉ោង ២៣និង០០នាទី ថ្ងៃទី០៧ ខែសីហា ឆ្នាំ២០២៤ នៅត្រង់ចំណុចភូមិអូរតាគាំ១ សង្កាត់ទួលតាឯក ក្រុងបាត់ដំបង ដោយបានឃាត់ខ្លួនជនសង្ស័យ០១នាក់ឈ្មោះ ឈួម សុខវណ្ណី ហៅ ឃ្លោក ភេទប្រុស អាយុ ៣៧ ឆ្នាំ មានទីលំនៅភូមិកគោ ឃុំជ្រៃ ស្រុកថ្មគោល ខេត្តបាត់ដំបង ។

ក្រោយឃាត់ខ្លួនជនសង្ស័យខាងលើ សមត្ថកិច្ចជំនាញបានដកហូតវត្ថុតាងរួមមាន: គ្រឿងញៀនគ្រាប់រាងមូលសំប៉ែតពណ៌ផ្កាឈូកចំនួន ១៩៧៦ គ្រាប់ និងថ្នាំដែលបានបែកខ្ទេចមួយចំនួនសង្ស័យមានសារធាតុញៀន ,កាំភ្លើងម៉ាក ROLOចំនួន០១ដើម មានគ្រាប់ចំនួន ២៥គ្រាប់ និងសំបកគ្រាប់ចំនួន០៦ , ទូរស័ព្ទដៃចំនួន ០៣គ្រឿង ,រថយន្តម៉ាកកូរ៉ូឡាពណ៌ស្លែបិទស្គុតស ពាក់ស្លាកលេខ ភ្នំពេញ 2G-7741 ចំនួន០១គ្រឿង និងសម្ភារៈសម្រាប់ច្រករំលែកថ្នាំញៀនលក់និងសម្ភារៈសម្រាប់ប្រើប្រាស់ថ្នាំញៀនមួយចំនួន ។

ក្រោយពីឃាត់ខ្លួន ជនសង្ស័យរួមជាមួយវត្ថុតាង រហូតមកដល់ពេលនេះត្រូវបានកម្លាំងជំនាញអធិការនគរបាលក្រុងកំពុងក៏សាងសុំណុំរឿងដើម្បីចាត់ការតាមនីតិវិធីច្បាប់ ៕

ដោយ ៖ សាលី