ពលរដ្ឋងាយរងគ្រោះ ១០០គ្រួសារ នៅស្រុករតនៈមណ្ឌល ទទួលបានអំណោយកាកបាទក្រហមកម្ពុជា
បាត់ដំបង ៖ នៅព្រឹកថ្ងៃទី១៥ ខែកក្កដា ឆ្នាំ២០២៤នេះ កាកបាទក្រហមកម្ពុជា ដែលមានសម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ក្រុមការងារសាខាកាកបាទក្រហមកម្ពុជាខេត្តបាត់ដំបងដឹកនាំដោយឯកឧត្តម សុខ លូ ជាប្រធាននិងសការី បានចុះសួរសុខទុក្ខ និងផ្តល់អំណោយមនុស្សធម៌ ដល់ប្រជាពលរដ្ឋងាយរងគ្រោះបំផុត ចំនួន១០០គ្រួសារ នៅស្រុករតនមណ្ឌល ។
![](https://www.khmerpit.news/wp-content/uploads/2024/07/IMG_20240715_130955_212-650x434.jpg)
ឯកឧត្តម សុខ លូ ប្រធានគណៈកម្មាធិការសាខា បានពាំនាំនូវការផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់ចំពោះប្រជាពលរដ្ឋគ្រប់រូប ជាពិសេសប្រជាពលរដ្ឋដែលរងគ្រោះ និងងាយរងគ្រោះ ទោះនៅទីណាក៏ដោយ ត្រូវមានការប្រុងប្រយ័ត្នខ្ពស់ឲ្យជាប់ជាប្រចាំ ពោលគឺសម្តេចកិត្តិព្រឹទ្ធបណ្ឌិត តែងតែយកចិត្តទុកដាក់ និងគិតគូរខ្ពស់ចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ពោលគឺ ទីណាមាន ទុក្ខលំបាក ទីនោះមានកាកបាទក្រហមកម្ពុជា ។
![](https://www.khmerpit.news/wp-content/uploads/2024/07/IMG_20240715_130955_430-650x434.jpg)
ឯកឧត្តមប្រធាន បានក្រើនរំលឹកនិងអំពាវនាវដល់ប្រជាពលរដ្ឋទាំងអស់ចូលរួមសហការជាមួយអាជ្ញាធរនិងសមត្ថកិច្ចពាក់ព័ន្ធ ក្នុងការរាយការណ៍ពេលជួបនឹងសកម្មភាពនានាពីការជួញដូរ ចែកចាយ និងប្រើប្រាស់គ្រឿងញៀននៅតាមសហគមន៍ ការចំណាក់ស្រុកខុសច្បាប់ ដើម្បីមានការអន្តរាគមន៍បង្រ្កាបបានទាន់ពេលវេលា ទី២បញ្ហាគ្រោះថ្នាក់ចរាចរណ៍នៅតែជាហានិភ័យខ្ពស់សម្រាប់ការរស់នៅប្រចាំថ្ងៃរបស់យើងទាំងអស់គ្នា សូមប្រជាពលរដ្ឋចូលរួមអប់រំណែនាំកូនចៅរបស់ខ្លួនឱ្យបានជាប់ជាប្រចាំ ដើម្បីឱ្យពួកគេគោរពច្បាប់ចរាចរណ៍ ពិសេសក្នុងពេលបើកបរសូមកុំសេពគ្រឿងស្រវឹង ត្រូវពាក់មួកសុវត្ថិភាពរាល់ពេលបើកបរម៉ូតូ ទោះទៅទីជិតឬឆ្ងាយ និងពាក់ខ្សែក្រវ៉ាត់ឱ្យបានត្រឹមត្រូវពេលបើកបររថយន្ត ដើម្បីកាត់បន្ថយអត្រាគ្រោះថ្នាក់ចរាចរណ៍សម្រាប់ខ្លួនឯងនិងអ្នកដទៃ។
![](https://www.khmerpit.news/wp-content/uploads/2024/07/IMG_20240715_130955_558-650x433.jpg)
អំណោយដែលគ្រួសារនីមួយៗ ទទួលបានរួមមាន ៖ អង្ករ២៥គីឡូក្រាម, ទឹកបរិសុទ្ធ០១កេស, មី០១កេះ, ត្រីខ១០កំប៉ុង, ទឹកស៊ីអ៉ីវ០១យួរ, ទឹកត្រី០១យួរ ៕
![](https://www.khmerpit.news/wp-content/uploads/2024/07/IMG_20240715_130955_370-650x433.jpg)
![](https://www.khmerpit.news/wp-content/uploads/2024/07/IMG_20240715_130955_945-650x434.jpg)
![](https://www.khmerpit.news/wp-content/uploads/2024/07/IMG_20240715_130956_087-650x434.jpg)
![](https://www.khmerpit.news/wp-content/uploads/2024/07/IMG_20240715_130956_020-650x433.jpg)
![](https://www.khmerpit.news/wp-content/uploads/2024/07/IMG_20240715_130959_960-650x650.jpg)
ដោយ ៖ សាលី