ដកហូតកាំបិត.ដាវ.ពូថៅ.និងវត្ថុល្មើសជាច្រើនផ្សេងទៀត ក្រោយឃាត់ខ្លួនបជនសង្ស័យ០៤នាក់

បាត់ដំបង ៖ កម្លាំងមូលដ្ឋានកងរាជអាវុធហត្ថស្រុកសង្កែ បានដកហូតកាំបិត.ដាវ.ពូថៅ.និងវត្ថុល្មើសជាច្រើនផ្សេងទៀត ក្រោយឃាត់ខ្លួនជនសង្ស័យ០៤នាក់ ជាប់ពាក់ព័ន្ធក្នុងករណី ជួញដូរគ្រឿងញៀន ។

សមត្ថកិច្ច បានអោយដឹងថា កិច្ចប្រតិបត្តិការខាងលើនេះ ក្នុងបទល្មើសជាក់ស្តែងនៅវេលាម៉ោង ១៦និង១០នាទី ថ្ងៃទី២៤ ខែមិថុនា ឆ្នាំ២០២៤ នៅចំណុចក្រុមទី២៥ ភូមិស្វាយស ឃុំតាប៉ុន ស្រុកសង្កែ ខេត្តបាត់ដំបង កម្លាំងជំនាញបានធ្វើការឃាត់ខ្លួនជនសង្ស័យ០១នាក់ឈ្មោះ អេង ម៉េងជីង ភេទប្រុស អាយុ១៧ ឆ្នាំ រស់នៅភូមិតាប៉ុន ឃុំតាប៉ុន ស្រុកសង្កែ ខេត្តបាត់ដំបង ជាមួយវត្ថុតាងគ្រឿងញៀនចំនួន ០២កញ្ចប់ និងម៉ូតូ០១ គ្រឿង។

សមត្ថកិច្ច បានបញ្ជាក់ថា ក្រោយពីធ្វើការសាកសួរទៅជនសង្ស័យខាងលើ កម្លាំងជំនាញបានបន្តទៅចាប់ខ្លួនមេក្លោង និងបក្សពួកចំនួន ០៣នាក់ទៀត ដែលទី១ ឈ្មោះ ផា រង្សី ភេទប្រុស អាយុ២០ឆ្នាំ មុខរបរលក់ថ្នាំញៀន រស់នៅភូមិសម្តេច ឃុំតាប៉ុន ស្រុកសង្កែ ខេត្តបាត់ដំបង ( ម្ចាស់ថ្នាំ ), ទី២ ជាប្រពន្ធឈ្មោះ ម៉ុន សុចាន់ ភេទស្រី អាយុ២២ឆ្នាំ និងទី៣ ឈ្មោះ ចាក់ ជីវ័ន្ត ភេទប្រុស អាយុ១៦ឆ្នាំ មុខរបរកម្មករ រស់នៅភូមិតាប៉ុន ឃុំតាប៉ុន ស្រុកសង្កែ ខេត្តបាត់ដំបង និងឆែកឆេរចាប់យកវត្ថុតាងសរុបរួមមាន  ,គ្រឿងញៀនម្សៅក្រាមពណ៌ស ចំនួន០៥កញ្ចប់ ទម្ងន់ ៣.២៩ ក្រាម និង ថង់សម្រាប់វេចខ្ចប់មួយចំនួន ,ប្រាក់ខ្មែរ ចំនួន ២០០,០០០ រៀល ,ប្រាក់បាត ចំនួន ១០០បាត ,ម៉ូតូចំនួន ០២គ្រឿង , ទូរស័ព្ឌដៃ ចំនួន០៣ គ្រឿង ,កាំបិតងុកដងដែក ចំនួន ០២ដើម,ដាវ ចំនួន០៣ដើម , ខ្វែវ ចំនួន ០៤ដើម ,ពូថៅ ចំនួន ០១ដើម ,ឧបករណ៍ឆក់ត្រី ចំនួន០១គ្រឿង។

បច្ចុប្បន្នជនសង្ស័យទាំង ០៤នាក់ត្រូវបានឃាត់ខ្លួននៅមូលដ្ឋានកងរាជអាវុធហត្ថស្រុកសង្កែ ដើម្បីកសាងសំណុំរឿងចាត់ការបន្តតាមនីតិវិធី ៕

ដោយ ៖ សាលី