បើករថយន្តខ្វះការប្រុងប្រយ័ត្ន ទៅបុករថភ្លើង បណ្តាលអោយ ខូចខាតយ៉ាងដំណំ

បាត់ដំបង ៖ ហេតុការណ៍គ្រោះថ្នាក់ចរាចរ មួយបានកើតឡើង ដែលបង្កដោយរថយន្តហាយឡែនដឺ ១គ្រឿង បានបើកបរទៅបុករថភ្លើង បង្កការភ្ញាក់ផ្អើលនៅវេលាម៉ោង ១២និង៤០នាទី ថ្ងៃទី១៨ ខែមិថុនា ឆ្នាំ ២០២៤ ផ្លូវរ៉ាអូរដំបង១ ស្ថិតក្នុងភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង។

ប្រភពកន្លែងកើតហេតុ បានឲ្យដឹងថា នៅមុនពេលកើតហេតុគេឃើញ រថភ្លើងដឹកអ្នកដំណើរមួយខ្សែ បានធ្វើដំណើរទិសដៅពីត្បូងទៅជើង (ភ្នំពេញ ទៅ បាត់ដំបង) លុះមកដល់ចំណុចកើតហេតុខាងលើ ក៏មានរថយន្តម៉ាក TOYOTA  HIGH LANDER ពណ៌ខ្មៅ មួយគ្រឿង ពាក់ស្លាកលេខ ភ្នំពេញ2K-9177 បើកបរដោយបុរសម្នាក់ ក្នុងទិសដៅពីលិច ទៅកើត បានបុកគ្នាពេញទំហឹង បណ្តាលអោយរងការខូចខាតនៅផ្នែកខាងមុខរថយន្តយ៉ាងដំណំ ចំណែករថភ្លើងបន្តដំណើរមុខធម្មតា។

ក្រោយពេលកើតហេតុ សមត្ថកិច្ចនគរបាលជំនាញ បានចុះទៅពិនិត្យធ្វើកំណត់ហេតុ យករថយន្តទៅរក្សាទុកនៅការិយាល័យជំនាញ រង់ចាំការដោះស្រាយនៅពេលក្រោយ៕

ដោយ ៖ សាលី