ជនសង្ស័យម្នាក់ ត្រូវបានឃាត់ខ្លួន ក្រោយប្រើប្រាស់ដាវនិងដុំថ្ម គប់អោយបុរសម្នាក់រងរបួសជើង

បាត់ដំបង ៖ កម្លាំងអាវុធហត្ថស្រុកថ្មគោល ឃាត់ខ្លួនជនសង្ស័យ០១នាក់ ក្នុងចំណោមប័ក្សពួកម្នាក់ទៀតកំពុងរត់គេចខ្លួន ក្រោយធ្វើសកម្មភាពដោយប្រើប្រាស់ដាវ និងដុំថ្ម កាប់និងគប់ ទៅលើបុរសម្នាក់អោយរងរបួសជើង។

កិច្ចប្រតិបត្តិការខាងលើនេះ ធ្វើឡើងនៅវេលាម៉ោង ១និង៣០នាទី រំលងអធ្រាត្រ ឈានចូលថ្ងៃទី ៣០ ខែឧសភា ឆ្នាំ២០២៤ នៅចំណុចភូមិគ្រួស ឃុំជ្រៃ ស្រុកថ្មគោល ខេត្តបាត់ដំបង ដោយបានឃាត់ខ្លួនជនសង្ស័យចំនួន០១នាក់ឈ្មោះ ជា សុខមុន្នី ភេទប្រុស អាយុ ៣៦ឆ្នាំ មុខរបរកម្មករ.និងម្នាក់ទៀតឈ្មោះ និល សុភា ភេទប្រុស អាយុប្រហែល ២៤ឆ្នាំ មុខរបរបើកបរ(កំពុងរត់គេចខ្លួន)។

សមត្ថកិច្ចបានបញ្ជាក់ថា ជនសង្ស័យទាំងពីរនាក់ខាងលើ នៅវេលាម៉ោង០០និង៣០នាទី រំលងអធ្រាត្រ ពួកគេបានប្រើប្រាស់ដាវចំនួន០១ដើមធ្វើសកម្មភាពដេញកាប់និងគប់ដុំថ្មទៅលើជនរងគ្រោះឈ្មោះ គង់ សេងហាក់ ភេទប្រុស អាយុ ២៥ឆ្នាំ មុខរបរជាមន្ត្រីរាជការ បណ្តាលអោយត្រូវកំភួនជើងខណ:ពេលដែលជនរងគ្រោះជូនមិត្តភ័ក្តស្រី០៣នាក់ទៅផ្ទះចំណុចកើតហេតុខាងលើ។

ក្រោយពីឃាត់ខ្លួនសមត្ថកិច្ចដកហូតបានវត្ថុតាងដាវចំនួន០១ដើម ,ម៉ូតូចំនួន០១គ្រឿង និងទូរស័ព្ទដៃចំនួន០២គ្រឿង បន្ទាប់មកបានធ្វើកំណត់ហេតុបញ្ជូនទាំងមនុស្សនិងវត្ថុតាងទៅការិយាល័យជំនាញដើម្បីចាត់ការតាមនីតិវិធី ៕
ដោយ ៖ សាលី