រន្ទះបាញ់គោមេ០១ក្បាលងាប់ភ្លាមៗ ខណៈពេលម្ចាស់ចងអោយស៊ីស្មៅនៅហាលវាល

បាត់ដំបង ៖ សត្វគោមេ០១ក្បាល ត្រូវបានរន្ទះបាញ់ងាប់ភ្លាមៗ នៅពេលដែលម្ចាស់ចងអោយស៊ីស្មៅ លើដីហាលវាលពេលមេឃកំពុងធ្លាក់ភ្លៀងខ្លាំង។

ប្រភពពីសមត្ថកិច្ចបានអោយដឹងថា ករណីរន្ទះបាញ់សម្លាប់សត្វគោមេ០១ក្បាលរបស់កសិករខាងលើនេះបានកើតឡើងនៅវេលាម៉ោង ១៣និង០០នាទី ថ្ងៃទី២១ ខែឧសភា ឆ្នាំ២០២៤ ស្ថិតក្នុងភូមិល្វាទេ ឃុំត្រាង ស្រុកកំរៀង ខេត្តបាត់ដំបង ខណៈដែលមេឃកំពុងធ្លាក់ភ្លៀងមួយមេធំ លាយឡំជាមួយផ្គរន្ទះ។

ម្ចាស់សត្វគោមានឈ្មោះ សាំង សាន ភេទប្រុស អាយុ៤២ឆ្នាំ ជាកសិកររស់នៅកន្លែងភូមិឃុំកើតហេតុខាងលើបានបញ្ជាក់ថា មុនពេលកើតហេតុខ្លួនបានដឹកគោទៅចងដើម្បីអោយស៊ីស្មៅនៅលើដីហាលវាលមិនបានដេញចូលផ្ទះ លុះពេលមេឃធ្លាក់ភ្លៀង លាយឡំជាមួយខ្យល់កន្ត្រាក់ និងរន្ទះស្រាប់តែបាញ់មកលើសត្វបណ្តាលអោយងាប់ភ្លាមៗតែម្តង៕

ដោយ ៖ សាលី