ឃាត់ខ្លួនជនសង្ស័យ០២នាក់ ក្រោយធ្វើសកម្មភាព លួចកាត់ខ្សែភ្លើង បំភ្លឺផ្លូវទីសាធារណៈ

បាត់ដំបង ៖ ជនសង្ស័យ២នាក់ ត្រូវបានកម្លាំងកងរាជអាវុធហត្ថខេត្តបាត់ដំបង ធ្វើការឃាត់ខ្លួនកាលពីថ្ងៃទី២១ ខែឧសភា ឆ្នាំ២០២៤ នៅចំណុចក្នុងរ៉ារថភ្លើង​ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង បន្ទាប់ពីពួកគេធ្វើសកម្មភាព លួចកាត់ខ្សែភ្លើងបំភ្លឺតាមផ្លូវសាធារណៈ នៅចំណុចខាងមុខវត្តកណ្តាល ស្ថិតក្នុងភូមិរំចេក៤ សង្កាត់រតន ក្រុងបាត់ដំបង ។

ជនសង្ស័យត្រូវបានឃាត់ខ្លួនទី១-ឈ្មោះ ផល រ៉ា ហៅ ព្រែង ភេទប្រុស អាយុ ៤៤ឆ្នាំ មុខរបរមិនពិតប្រាកដ ទីលំនៅបច្ចុប្បន្នក្នុងស្ថានីយរថភ្លើង ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង និងទី២-ឈ្មោះ ហេង ណារិន ហៅ ពើលើ ភេទប្រុស អាយុ ២៥ឆ្នាំ មុខរបរមិនពិតប្រាកដ ទីលំនៅបច្ចុប្បន្នក្នុងភូមិអូរចារ សង្កាត់អូរចារ ក្រុងបាត់ដំបង ជាមួយវត្ថុតាងរួមមាន ៖ខ្សែភ្លើងចំនួន ១៣កំណាត់ ស្មើនឹង ១៦ម៉ែត្រ , ស្ពាន់(ខ្សែភ្លើង)ចំនួន ០១ ដុំ , និងកូនកាំបិទ ០១ដើម។

បច្ចុប្បន្ន ជនសង្ស័យនិងវត្ថុតាង កំពុងឃាត់សាកសួរនៅការិយាល័យព្រហ្មទណ្ឌអាវុធហត្ថខេត្ត ដើម្បីកសាងសំណុំរឿងចាត់ការតាមនីតិវិធី៕
ដោយ ៖ សាលី