ដីសហគមន៍ព្រៃម្លោងជាច្រើនហិកតា ស្រុកគូលែន រកការទន្ទ្រានកាប់បំផ្លាញ ពីមន្ត្រីដឺបេពាក់សក្តិ៣ម្នាក់ យកទៅលក់ក្នុងតម្លៃ១៣០០- ១៥០០ដុល្លារ ក្នុង១ហិកតា
ព្រះវិហារ៖ បើយោងតាមប្រភពព័ត៌មានពីប្រជាពលរដ្ឋ បានឲ្យដឹងថា ដីនៅចំណុចព្រៃម្លោងស្ថិតនៅក្នុងភូមិក្តាក់ ឃុំភ្នំត្បែង ស្រុកគូលែន ត្រូវបានឈ្មោះក្រូច ប៊ុន គីម ជាមន្ត្រីយោធាដឺបេពាក់សក្តិ៣ នៅភូមិភាគ៤ បានប្រើអំណាច និងតួនាទីរបស់ខ្លួន កាប់រុករានទន្ទ្រានដីសហគមន៍ជាច្រើនហិកតា ដើម្បីយកទៅលក់ទៅឱ្យឈ្មោះ ហៀត អុល និងឈ្មោះ គៀង។
បើតាមការបញ្ជាក់របស់ឈ្មោះ ហៀត អុល បានឲ្យដឹងថា ដីនៅចំណុចព្រៃម្លោង ក្នុងភូមិក្ដាក់ ឃុំភ្នំត្បែង ស្រុកគូលែន គាត់ពិតជាបានទិញពីឈ្មោះ ក្រូច ប៊ុន គីមពិតប្រាកដមែន។ដីដែលគាត់ទិញនោះមានចំនួន ៦ ហិកតាកន្លះ ក្នុងមួយហិកតា តម្លៃ ១៣០០ដុល្លារ។លោកបានបន្តទៀតថា ការទិញលក់នេះ មានលិខិតទិញលក់ផ្ដិតមេដៃភាគីទាំងសង្ខារ។ឈ្មោះ ហៀត អុល បានបន្តទៀតថា លោក ក្រូច ប៊ុន គីម សន្យានឹងកាត់ប្លង់ជូនលោក។
ចំណែកម្ចាស់ដីម្នាក់ទៀតឈ្មោះ លោក គៀង បានឱ្យដឹងថា ដីនៅចំណុចខាងលើ រូបគាត់ក៏បានទិញពីឈ្មោះ ក្រូច ប៊ុនគីមជាមន្ត្រីដឺបេម្នាក់នេះដែរ។លោកបានបន្តទៀតថា ដីដែលលោកទិញមាន ចំនួន៧ហិកតា ក្នុងមួយហិកតាមានតម្លៃ ១៥០០ដុល្លារ ហើយលោក ក្រូច ប៊ុន គីម ធនាឈូសឆាយព្រៃឱ្យមួយស្អាត។
បើតាមពីប្រជាពលរដ្ឋ បានលើកឡើងថា លោក ក្រូច ប៊ុនគីម ជាមន្ត្រីដឺបេពាក់សក្តី៣ បម្រើការងារនៅភូមិភាគ ៤ ម្នាក់នេះ មិនត្រឹមតែយកដីសហគមន៍ទៅលក់នោះទេ ថែមទាំងប្រើអំណាចមកលើប្រជាពលរដ្ឋ ទៅរំលោភយកដីប្រជាពលរដ្ឋ ដែលធ្លាប់អាស្រ័យផលកន្លងមក ជាច្រើនកន្លែងផងដែរ។ប្រជាពលរដ្ឋ បានបន្តទៀតថា ដីដែលពួកគាត់អាស្រ័យផលនោះ សុទ្ធតែមានឯកសារ និងមានសលាកបត្រទៀតផង។ ពាក់ព័ន្ធរឿងនេះ ប្រជាពលរដ្ឋក៏បានដាក់ពាក្យប្ដឹងទៅកាន់សាលាស្រុកគូលែន ជាច្រើនដងផងដែរ តែលោក ក្រូច ប៊ុន គីម មិនបានចូលខ្លួនដោះស្រាយនោះទេគឺឲ្យប្រពន្ធអ្នកមកដោះស្រាយទៅវិញ។
ជាក់ស្ដែងនៅថ្ងៃទី២០ ខែឧសភាឆ្នាំ ២០២៤ លោក យឹម ប៊ុនថេន នាយសង្កាត់រដ្ឋបាលព្រៃឈើស្រុកគូលែន បានដឹកនាំកម្លាំងមន្ត្រីសហគមន៍ព្រៃម្លោង រួមនឹងអ្នកសារព័ត៌មានជាច្រើនស្ថាប័ន បានចុះទៅដល់នៅចំណុចដីទីតាំងខាងលើនេះផ្ទាល់ លោក យឹម ប៊ុនថេន នាយសង្កាត់រដ្ឋបាលព្រៃឈើស្រុកគូលែន ក៏បានឱ្យដឹងផងដែរថា ដីនៅចំណុចព្រៃម្លោងស្ថិតនៅ ភូមិក្តាក់ ឃុំភ្នំត្បែងស្រុកគូលែន ពិតជាដីនៅក្នុងដែនព្រៃសហគមន៍ព្រៃម្លោងពិតប្រាកដមែន។លោក បានបន្តទៀតថា លោកនឹងស្រង់ឈ្មោះបុគ្គល ដែលពាក់ព័ន្ធ និងបន្តនីតិវិធីទៅតាមច្បាប់។
យោងតាមឯកសារ ភស្តុតាង មន្ដ្រីជំនាញ ប្រជាសហគមន៍ រួមទាំងប្រជាពលរដ្ឋ ត្រូវបានរកឃើញថា ក្រោយពីការចុចយូភីអឹម (UPM) លើដីទីតាំងខាងលើនេះ ពិតជាលោក លោក ក្រូច ប៊ុនគីម ជាមន្ត្រីដឺបេពាក់សក្តី៣ បម្រើការងារនៅភូមិភាគ ៤ ម្នាក់នេះ រំលោភយកដីព្រៃសហគមន៍ពិតប្រាកដមែន ។ ប្រជាពលរដ្ឋ សង្ឃឹមថា ច្បាប់និងមានវិធានការទៅលើបុគ្គលម្នាក់នេះ កុំឲ្យប្រើអំណាចនិងតួនាទីគាបសង្កត់មកលើប្រជាពលរដ្ឋបន្ដទៀត។
សូមបញ្ជាក់ផងដែរថា មន្ដ្រីជំនាញរដ្ឋបាលព្រៃឈើស្រុកគូលែន រួមទាំងមន្ត្រីសហគមន៍ព្រៃម្លោង និងក្រុមអ្នកសារព័ត៌មានយើង បានចុះទៅពិនិត្យដល់ទីតាំងផ្ទាល់ បានប្រទះឃើញព្រៃឈើរងការកាប់បំផ្លាញ ដុតភ្លើងក្លាយទៅជាវាលរហោស្ថានដ៏គួរឱ្យសង្វេក គ្មានការទប់ស្កាត់ ឬបង្ក្រាបពីមន្ត្រីពាក់ព័ន្ធនោះទេ ។
ក្រុមអ្នកសារព័ត៌មានយើង ជួបផ្ទាល់ជាមួយប្រជាពលរដ្ឋ ដែលកំពុងដាំដំឡូង លើដីព្រៃរងការដុតភ្លើងផ្សែងហុយៗ ពួកគាត់ បានអះអាងថា ស៊ីឈ្នួលដាំដំឡូងឱ្យគេក្នុងមួយថ្ងៃតម្លៃ ២៥០០០រៀល ដោយពួកគាត់ មិនបានបញ្ជាក់ថា បុគ្គលដែលគាត់ស៊ីឈ្នួលនោះ ជាអ្នកនណានោះទេ ។
ដូច្នេះប្រជាពលរដ្ឋ ស្នើសុំ ដល់អង្គភាពយោធភូមិភាគទី៤ និងឯកឧត្តម គីម រិទ្ធី អភិបាលខេត្តព្រះវិហារ ជួយរកយុត្តិធម៌ និងដំណោះស្រាយជូនពួកគាត់ផង ព្រោះពួកគាត់ប្រជាពលរដ្ឋស្លូតត្រង់ គ្មានសិទ្ធិអំណាចអ្វីទៅតតាំងជាមួយមន្ត្រីយោធាពាក់សក្តិ៣ លោក ក្រូច ប៊ុនគីម ដែលបានប្រើប្រាស់អំណាចមករំលោភបំពានយកដីរបស់ពួកគាត់ ទាំងដែលដីរបស់ពួកគាត់មានសលាកបត្រ ។ សារព័ត៌មានខ្មែរពិត ទទួលការបកស្រាយ ពីភាគីពាក់ព័ន្ធ បើមានព្រឹត្តិកម្មណាមួយនោះ ដោយយោងតាមច្បាប់ស្ដីពីរបបសារព័ត៌មាន នៃព្រះរាជាណាចក្រកម្ពុជា៕
(លោក ក្រូច ប៊ុនគីម ជាមន្ត្រីដឺបេពាក់សក្តី៣)
