សិង្ហបុរី​កោតសរសើរ​កម្ពុជា​ ដែល​គ្រប់គ្រង​បញ្ហា​កូ​វីដ​-១៩​ បានល្អ​ប្រសើរ​ មិនឱ្យ​ឆ្លង​ចូល​សហគមន៍

161

ភ្នំពេញ ៖ ​សម្តេច​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា​ នៅ​ថ្ងៃទី​០៣ ​ខែវិច្ឆិកា​នេះ បាន​អនុញ្ញាត​ឱ្យ ឯក អគ្គរដ្ឋទូត​សិង្ហ​បុរី ចូលជួប​សំដែង​ការគួរសម​ និង​ជម្រាបលា ខណៈ​ឯកឧត្តម ​បាន​បញ្ចប់​អាណត្តិ​បេសកកម្ម​ការទូត​នៅកម្ពុជា ហើយ​ឯកឧត្ដម​ បាន​កោត​សរសើ​រ​កម្ពុជា​ដែល​គ្រប់គ្រង​បញ្ហា​កូ​វីដ​-១៩​ បានល្អ​ប្រសើរ​មិន​ឱ្យ​ឆ្លង​ចូល​សហគមន៍​។

ឯកឧត្តម អ៊ាង សុផល្លែត ជំនួយការ​ផ្ទាល់​សម្តេច​តេ​ជោ ហ៊ុន សែន បាន​ប្រាប់​ក្រុម​អ្នកសារព័ត៌មាន​ថា ឯកអគ្គ​រដ្ឋ ទូត​សិង្ហបុរី​ បាន​ជម្រាប​ជូន​សម្តេច​ថា ​ក្នុង​រយៈពេល​៤​ឆ្នាំកន្លះ ​ក្នុង​បេសកកម្ម​ការទូត​នៅ​កម្ពុជា ​ឯកឧត្តម ពិតជា​មោទនភាព​ ដែល​បាន​បំពេញការងារ​យ៉ាង​ជិតស្និទ្ធ ​និង​ការគាំទ្រ ​និង​សហការ​យ៉ាង​ល្អ​ពី​មន្ត្រីរាជការ ​និង​កិច្ចសហការ​យ៉ាង​ល្អ​ពី​រាជរដ្ឋាភិបាល​កម្ពុជា ​ទទួល​បាន​ជោគជ័យ​យ៉ាង​ត្រចះត្រចង់ ​និង​នាំមក​នូវ​ទំហំ​ពាណិជ្ជកម្ម ​ វិនិយោគ រវាង ​ប្រទេស​ទាំងពីរ ជាមួយ​នឹង​ការអភិវឌ្ឍ​ធនធានមនុស្ស​ខ្ពស់​មួយ​កម្រិត​ទៀត​ ហើយ​ក្នុង​ដំណាក់កាល​នៃ​វិបត្តិ​កូ​វីដ​១៩ ឯកឧត្តម​ មើលឃើញថា កម្ពុជា ​គឺជា​ប្រទេស​ដែល​មាន​សុវត្ថិភាព​បំផុត​សម្រាប់​ការរស់នៅ​ចៀស ផុត​ពី​ការ​ឆ្លង​កូ​វីដ​-១៩​។

ជាការ​ឆ្លើយតប សម្តេច​តេ​ជោ បាន​ថ្លែងអំណរគុណ​ដល់​រដ្ឋាភិបាល​សិង្ហ​បុរី ដែល​បាន​គាំទ្រ​កម្ពុជា ក្នុង​រយៈពេល ក​ន្លងមក និង​បាន​យល់ស្រប​ផងដែរ​ ជាមួយ​ឯកឧត្តម​ទូត​សិង្ហ​បុរី ​ដែល​បានលើកឡើង​ វាយតម្លៃ​អំពី​ទំនាក់ទំនង​ដ៏​ល្អ​រវាង​ប្រទេស​ទាំងពីរ​។ ​សម្តេច​ ក៏បាន​ថ្លែងអំណរគុណ​ដល់​ឯកឧត្តម​ ឯកអគ្គរដ្ឋទូត ​ដែល​បាន​ប្រឹងប្រែង​អស់ពី​សមត្ថភាព ​ពង្រីក ពង្រឹង​ លើកកម្ពស់​ទំនាក់ទំនង ​និង​កិច្ច​សហប្រតិបត្តិការ​ល្អ រវាង​ប្រទេស​ទាំងពីរ ​តាមរយៈ​ការ​ខិតខំ​ប្រឹងប្រែង របស់​ឯក ឧ​ត្ត​ម​ នៅ​កម្ពុជា​អស់​រយៈពេល​៤​ឆ្នាំកន្លះ​ កន្លងមកនេះ​។ ពាក់ព័ន្ធ​នឹង​កូ​វីដ​១៩ ​សម្តេច​ក៏បាន​ជម្រាប​ជូន​ថា រាជ​រដ្ឋា​ភិបាល​កម្ពុជា​ មាន​យុទ្ធសាស្ត្រ​ប្រយុទ្ធ​ នឹង​កូ​វីដ​១៩ ​តាមរយៈ​សមរភូមិ​៣ ទី​១. គឺ​ធ្វើយ៉ាងណា​ទប់ស្កាត់​កុំឱ្យ​មានការ​នាំចូល​ ពី​ប្រទេសក្រៅ ទី​២. ធ្វើយ៉ាងណា​គ្រប់គ្រង​ការ​​រីក​រាលដាល​ចូល​ទៅក្នុង​សហគមន៍ និង​ទី​៣. ​គឺ​ធ្វើយ៉ាង​ណា​ព្យាបាល​អ្នក ដែល​បាន​ឆ្លង​ជំងឺ​កូ​វីដ​១៩​នេះ គឺ​ព្យាបាល​ឱ្យ​បាន​ជាសះស្បើយ​៕

ចំណែក