ឃាត់ខ្លួនជនសង័្សយ០២នាក់ក្នុងករណីរំលោភលេីទំនុកចិត្តនិងអ្នកទទួលបញ្ចាំ
ខេត្តបាត់ដំបង! ដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបងក៏ដូចជាយោបល់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងដោយបានការសម្របសម្រួលលេីនីតិវិធីពី លោក កែវ សុជាតិ ព្រះរាជអាជ្ញា នៃអយ្យការអមសាលាដំបូងផងនោះ លោកវរ សេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំងក្រុមអន្តរាគមន៍ បង្ការបង្ក្រាប ចុះប្រតិបត្តិការបង្ក្រាបករណី រំលោភលើទំនុកចិត្ត(បញ្ចាំម៉ូតូ)០១ករណីនិងបានធ្វេីការនាំខ្លួនជនសង្ស័យចំនួន០២នាក់។
លោកវរសេនីយ៍ឯក ឈឿង គឹមសុង បានប្រាប់អោយដឹងនៅល្ងាចថ្ងៃទី២៤ ខែឧសភា ឆ្នាំ២០២២នេះថា ជនសង្ស័យត្រូវបានឃាត់ខ្លួន ទី១-ឈ្មោះ ប៉េ សីហា (ហៅខ្វាក់) ភេទប្រុស អាយុ ៣៨ឆ្នាំ មានទីលំនៅភូមិរំចេក៤ សង្កាត់រតនៈ ក្រុងបាត់ដំបង(អ្នកយកម៉ូតូទៅបញ្ចាំ) ទី២-ឈ្មោះ អ៊ូច សារ៉ន ភេទប្រុស អាយុ ៥៣ឆ្នាំ មានទីលំនៅភូមិសំរោងក្នុង ឃុំសំរោងក្នុង ស្រុកឯកភ្នំ ខេត្តបាត់ដំបង(ម្នាស់អ្នកទទួលបញ្ចាំ)
និងដកហូតវត្ថុតាង
– ម៉ូតូម៉ាកហុងដាឌ្រីមចំនួន ០៦គ្រឿង និងម៉ូតូម៉ាកហុងដាស្កុបពី ចំនួន០៣គ្រឿង។
គួរបញ្ជាក់ថា កាលពីថ្ងៃទី ១៣ ខែឧសភា ឆ្នាំ២០២២ វេលាម៉ោងប្រមាណ១៥និង៣០នាទីនៅចំណុចភូមិរំចេក៤ សង្កាត់រតនៈ ក្រុងបាត់ដំបង ជនសង្ស័យឈ្មោះ ប៉េ សីហា បានខ្ចីម៉ូតូ ០១គ្រឿង ម៉ាកហុងដាឌ្រីម ស៊េរីឆ្នាំ២០១០ ពាក់ស្លាកលេខបន្ទាយមានជ័យ 1C-6938 ពីជនរងគ្រោះឈ្មោះ ខៀវ សុថា ភេទប្រុស អាយុ៤៤ឆ្នាំ មានទីលំនៅភូមិសូភី២ សង្កាត់រតនៈ ក្រុងបាត់ដំបង ដើម្បីទៅញ៉ាំអី តែពេលខ្ចីម៉ូតូបានហេីយក៏យកទៅបញ្ចាំនឹងឈ្មោះ អ៊ូច សារ៉ន ដោយគ្មានឯកសារអ្វីទាំងអស់ ។
ដោយឃើញសកម្មភាពរបស់ជនសង័្សយបែបនេះជនរងគ្រោះបានដាក់ពាក្យបណ្តឹងចូលមកសមត្ថកិច្ចនគរបាលហើយឆ្លងតាមរយៈការស្រាវជ្រាវស៊ើបអង្កេត ទើបសមត្ថកិច្ចឈានដល់ការឃាត់ខ្លួនជនសង័្សយ រួចនាំទៅដល់កន្លែងទទួលបញ្ចាំឃាត់ខ្លួនម្ចាស់ទីតាំងនិងដកហូតម៉ូតូរបស់ជនរងគ្រោះរួមនឹងម៉ូតូពាក់ព័ន្ធផ្សេងទៀតសរុបចំនួន០៩គ្រឿង។
បច្ចុប្បន្ន ជនសង្ស័យនិងម្ចាស់ទទួលបញ្ចាំត្រូវបានសមត្ថកិច្ចការិយាល័យជំនាញកំពុងកសាងសំណុំរឿងដេីម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី រីឯម៉ូតូជនងគ្រោះត្រូវបានប្រគល់ជូនម្ចាស់វិញផងដែរ៕