ម៉ូតូពីរគ្រឿងបុកគ្នាពេញទំំហឹង បណ្តាលអោយមនុស្សប្រុសស្រី០៣នាក់ រងរបួសធ្ងន់ស្រាល

បាត់ដំបង ៖ យ៉ាងហោចណាស់មនុស្សប្រុសស្រី០៣នាក់ បានរងរបួសធ្ងន់ និងស្រាលនៅក្នុងហេតុការណ៍គ្រោះថ្នាក់ចរាចរណ៍ រវាងម៉ូតូពីរគ្រឿងបុកគ្នានៅវេលាម៉ោង១៨ និង៣០នាទី ថ្ងៃទី១០ ខែមីនា ឆ្នាំ២០២៤ នៅលើកំណាត់ផ្លូវភ្លោះមួយកន្លែង ស្ថិតក្នុងភូមិតាព្រួច សង្កាត់ក្តុលដូនទាវ ក្រុងបាត់ដំបង។

ប្រភពនៅកន្លែងកើតហេតុបានប្រាប់ថា នៅមុនពេលកើតហេតុ គេឃើញម៉ូតូម៉ាក វីវ៉ា ពណ៌ក្រហមមួយគ្រឿង ពាក់​ផ្លាកលេខ​ បាត់ដំបង 1Y-7226 បើកបរ​ដោយស្ត្រី ម្នាក់និងក្មេងស្រីអាយុ២ឆ្នាំម្នាក់ ក្នុងទិសដៅពីជើងទៅត្បូង (បញ្ចាស់ផ្លូវ)លុះមកដល់ចំណុចកើតហេតុខាងលើក៏ស្រាប់តែមានម៉ូតូម៉ាកហុងដាឌ្រីមពណ៌ខ្មៅមួយគ្រឿងពាក់ផ្លាកលេខ ពោធិ៍សាត់ 1H-2727បើកបរដោយបុរសម្នាក់ក្នុងទិសដៅពីត្បូងទៅជើងក្នុងល្បឿនយ៉ាងលឿន និងបានឡើងវ៉ាម៉ូតូមួយគ្រឿងផ្សេងទៀត ក៏ជ្រុលចង្កូតទៅបុកម៉ូតូវីវ៉ាពេញទំហឹងបណ្តាលអោយអូសជាង៦០ម៉ែត្ររងរបួសធ្ងន់ ចំណែកភាគីខាងម៉ូតូវីវ៉ាពីរនាក់ម៉ែកូនរបួសស្រាល។

ក្រោយពេលកើតហេតុ សមត្ថកិច្ចជំនាញបានចុះទៅដល់ធ្វើគំនូសហេតុ និងបញ្ជូនជនរងគ្រោះ​ទៅសង្រ្គោះព្យាបាលនៅឯមន្ទីរពេទ្យ ចំណែកមធ្យោបាយទាំងពីរត្រូវបានយកទៅរក្សាទុកនៅការិយាល័យចរាចរណ៍ផ្លូវគោកដើម្បីរងចាំដោះស្រាយតាមផ្លូវច្បាប់ ៕
ដោយ ៖ សាលី