ម៉ូតូពីរគ្រឿង បុកគ្នាពេញទំហឹង បណ្តាលអោយមនុស្ស០៣នាក់ រងរបួសធ្ងន់ស្រាល

បាត់ដំបង ៖ យ៉ាងហោចណាស់មនុស្សប្រុសស្រីចំនួន០៣នាក់ បានរងរបួសធ្ងន់ស្រាល ក្នុងហេតុការណ៍គ្រោះថ្នាក់ចរាចរណ៍មួយ ដែលកើតឡើងរវាងម៉ូតូ០២គ្រឿង បុកគ្នាពេញទំហឹងនៅវេលាម៉ោង១៨និង៣០នាទី ថ្ងៃទី២៩ ខែកុម្ភៈ ឆ្ឆ្នាំ២០២៤ នៅចំណុចផ្លូវបំបែកមួយកន្លែង ស្ថិតក្នុងភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង។

ប្រភពពីកន្លែងកើតហេតុ បានប្រាប់ថា នៅមុនពេលកើតហេតុ គេឃើញម៉ូតូម៉ាកហុងដា SPACY ពណ៌ប្រផេះ សេរីឆ្នាំ២០០៥ មួយគ្រឿង ពាក់ផ្លាកលេខ ភ្នំពេញ 1KL-9854 បើកបរដោយយុវជនម្នាក់ ក្នុងល្បឿនយ៉ាងលឿន ទិសដៅពីត្បូងទៅជើង លុះមកដល់ចំណុចកើតហេតុខាងលើ ក៏មានម៉ូតូ០១គ្រឿងផ្សេងទៀត ម៉ាកហុងដាឌ្រីម C125 ពណ៌ខ្មៅ ពាក់ផ្លាកលេខ បាត់ដំបង 1E-6861 (សណ្តោងរទេះ) បើកបរដោយបុរសម្នាក់ និងអ្នករួមដំណើរជាស្ត្រីម្នាក់ ទិសដៅពីលិចទៅកើត (ឆ្លងកាត់ផ្លូវ) ដោយខ្វះការប្រុងប្រយ័ត្ន ក៏ត្រូវម៉ូតូ SPACY បុកពេញទំហឹងបណ្តាលអោយអ្នកបើកបរទាំងពីរនាក់ រងរបួសធ្ងន់ និងអ្នករួមដំណើរជាស្រីរងរបួសស្រាល ។

ក្រោយពេលកើតហេតុ ក្រុមគ្រូពេទ្យ រួមនិងសមត្ថកិច្ចជំនាញ បានចុះទៅដល់ដឹកបញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យ ចំណែកមធ្យោបាយទាំងពីរត្រូវបានវាស់វែងធ្វើកំណត់ហេតុ យកទៅរក្សាទុកនៅប៉ុស្តិ៍នគរបាលរដ្ឋបាលអូរដំបង១ ដើម្បីរងចាំដោះស្រាយតាមផ្លូវច្បាប់ ៕
ដោយ ៖ សាលី