ជិះម៉ូតូបត់ឆ្វេង មិនប្រយ័ត្ន ត្រូវម៉ូតូខាងក្រោយ បុកពេញទំហឹង បណ្តាលអោយស្លាប់ភ្លាមនឹងកន្លែង

បាត់ដំបង ៖ បុរសវ័យ៧០ឆ្នាំម្នាក់ បានស្លាប់ភ្លាមៗនឹងកន្លែង ក្រោយជិះម៉ូតូឆ្លងផ្លូវត្រូវបានម៉ូតូមួយគ្រឿងទៀត បុកពីក្រោយពេញទំហឹង កាលពីព្រឹកថ្ងៃទី២១ ខែកុម្ភៈ ឆ្នាំ២០២៤ នៅតាមបណ្តោយផ្លូវជាតិលេខ៥ ខាងលិចរង្វង់មូលលោកយាយទេព ស្ថិតក្នុងភូមិអណ្តូងចេញ សង្កាត់អូរចារ ក្រុងបាត់ដំបង ។

ប្រភពនៅកន្លែងកើតហេតុ បានអោយដឹងថា នៅមុនពេលកើតហេតុគេឃើញម៉ូតូម៉ាក WAVE 110 ពណ៌ខ្មៅមួយគ្រឿង ពាក់ផ្លាកលេខ បាត់ដំបង 1AQ-0773 បើកបរដោយបុរសវ័យចំណាស់ម្នាក់ ឈ្មោះ ប៉ង់ ប៉ុក អាយុ៧០ឆ្នាំ រស់នៅភូមិអណ្តូងចេញ សង្កាត់អូរចារ ក្រុងបាត់ដំបង បើកបរក្នុងទិសដៅពីលិចទៅកើត លុះមកដល់ចំណុចកើតហេតុខាងលើបានបត់ឆ្វេងឆ្លងផ្លូវ ភ្លាមនោះក៏ស្រាប់តែមានម៉ូតូម៉ាកហុងដាឃ្លិចពណ៌សមួយគ្រឿង ពាក់ផ្លាកលេខបាត់ដំបង 1AR-4144 បើកបរដោយយុវសិស្សម្នាក់ក្នុងល្បឿនលឿនទិសដៅស្របគ្នាក៏ជ្រុលទៅបុកពេញទំហឹងបណ្តាលឱ្យបុរសចំណាស់ស្លាប់ភ្លាមៗ ចំណែកយុវសិស្សខាងលើរងរបួសធ្ងន់ផងដែរ។

ក្រោយពេលកើតហេតុ សមត្ថកិច្ចនគរបាលជំនាញបានចុះទៅដឹកបញ្ជូនជនរងគ្រោះ ទៅសង្រ្គោះព្យាបាលនៅមន្ទីរពេទ្យ ចំណែកសាកសពត្រូវបានប្រគល់អោយក្រុមគ្រួសារ យកធ្វើបុណ្យតាមប្រពៃណី ដោយឡែកមធ្យោបាយទាំងពីរត្រូវបានវាស់វែងធ្វើកំណត់ហេតុយកទៅរក្សាទុកនៅការិយាល័យនគរបាលចរាចរណ៍ផ្លូវគោកខេត្តដើម្បីចាត់ការតាមផ្លូវច្បាប់៕
ដោយ ៖ សាលី