ចោរលួចគោ ០១នាក់ ក្នុងចំណោមប័ក្សពួកគ្នា០៣នាក់ ត្រូវបានពលរដ្ឋចាប់បាន ខណៈពេលកំពុងគៀងគោចូលឡាន

បាត់ដំបង ៖ ជនសង្ស័យជាចោរលួចគោ០១នាក់ ក្នុងចំណោមប័ក្សពួកគ្នា០៣នាក់ ត្រូវបានពលរដ្ឋចាប់បានខណៈពេលកំពុងលួចគៀងគោប្រជាពលរដ្ឋចូលឡាន នៅវេលាម៉ោង០១និង៣០រសៀល ថ្ងៃទី០៤ ខែធ្នូ ឆ្នាំ២០២៣ នៅចំណុចចម្ការមៀន ជាប់នឹងផ្លូវកៅស៊ូមួយកន្លែង ស្ថិតក្នុងភូមិដង្គត់ ឃុំស្ដៅ ស្រុករតនមណ្ឌល ខេត្តបាត់ដំបង ។

ប្រភពពីប្រជាពលរដ្ឋ ដែលជាម្ចាស់គោ បានអោយដឹងថា នៅថ្ងៃកើតហេតុខ្លួន បានបញ្ចេញគោ០៦ក្បាល យកទៅចងអោយស៊ីស្មៅ នៅចំណុចភូមិសាស្ត្រខាងលើ លុះក្រោយមកបាត់មិនឃើញ ក៏នាំគ្នាពីរនាក់ប្តីប្រពន្ធជិះម៉ូតូស្វែងរក ក៏ប្រទះឃើញជនសង្ស័យម្នាក់ កំពុងយាមនៅច្រកចូលចំការ ក៏បានសួរនាំ ដោយខាងជនសង្ស័យបានឆ្លើយថា គោទៅលិចហើយ ក្នុងពេលដំណាលគ្នានោះ សត្វគោឮសូរសំឡេងម៉ាស៊ីនម៉ូតូ ស្ដាប់ស្គាល់ ក៏បានអើតករត់ចេញពីព្រៃបង្ហាញខ្លួន ឲ្យម្ចាស់ឃើញដូចបំណងមែន ភ្លាមនោះ ពួកខ្លួនជាម្ចាស់គោបានស្រែកឆោឡោឡើង រកបងប្អូនកំពុងធ្វើដំណើរតាមផ្លូវជួយចាប់ចោរផង និងទូរស័ព្ទទៅរកកម្លាំងសមត្ថកិច្ចផង ឃើញសភាពការណ៍ដូចនេះ ជនសង្ស័យម្នាក់បានលោតចុះពីឡាន រួមជាមួយប័ក្សពួកម្នាក់ទៀត ដែលកំពុងគៀងគោ បានរត់ចូលព្រៃបាត់ នៅសល់តៃកុងឡានម្នាក់ ដែលថយឡានមកពីក្នុងយ៉ាងលឿន និងបានជ្រុលឆ្លងទៅម្ខាងផ្លូវកៅស៊ូ បណ្តាលអោយធ្លាក់ក្នុងប្រព័ន្ធប្រឡាយ ក៏ត្រូវបានប្រជាពលរដ្ឋ រួបរួមគ្នាចាប់បានតែម្តង ។

ក្រោយពេលកើតហេតុ បន្ទាប់ពីទទួលបានព័ត៌មាន ពីប្រជាពលរដ្ឋភ្លាម សមត្ថកិច្ចមូលដ្ឋានបានចុះទៅទទួលនាំយកជនសង្ស័យ០១នាក់ និងមធ្យោបាយសម្រាប់ដឹកសត្វគោ ជារថយន្តតូរីសពណ៌ស មួយគ្រឿង ពាក់ផ្លាកលេខ បាត់ដំបង 2A-7546 មកកាន់អធិការដ្ឋាននគរបាលស្រុករតនមណ្ឌល ដើម្បីសាកសួរ និងកសាងសំណុំរឿងចាត់ការតាមនីតិវិធី ៕
ដោយ ៖ សាលី