អធិការស្រុកសំពៅលូនឃាត់ខ្លួន ជនសង្ស័យម្នាក់ កាត់របងសំណាញ់ចូលលួចបារី

បាត់ដំបង ៖អធិការនគរបាលស្រុកសំពៅលូន វរសេនីយ៍ទោ ទឹម វិឆ័យ បានឱ្យដឹងថា យោងតាមការអនុវត្តន៍របស់ ឯកឧត្តម ឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង លោកបានដឹកនាំកម្លាំងស្រុកសំពៅលូន ប្រតិបត្តិការនាំខ្លួនជនសង្ស័យចំនួន ០១នាក់ ពាក់ព័ន្ធករណីអំពើលួច ( ម្សៅ និងបារី ) នៅថ្ងៃទី២៥ ខែ សីហា ឆ្នាំ២០២៣ វេលាម៉ោងប្រហែល ០១ និង៣០នាទី នៅចំណុចក្រុមទី០៤ ភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង ទៅលើជនរងគ្រោះឈ្មោះ ផាន់ រស្មីសុវណ្ណ ភេទស្រី អាយុ៣៨ឆ្នាំ មានទីលំនៅ ភូមិស្រឡៅជ្រុំ ឃុំសិរីមានជ័យ ស្រុកសំពៅលូន ខេត្តបាត់ដំបង ប្រព្រឹត្តដោយជនសង្ស័យឈ្មោះ ជឿន គុន្ឋា ហៅធា ភេទប្រុស អាយុ ២៩ឆ្នាំ មានទីលំនៅភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង បានធ្វើសកម្មភាពកាត់របងសំណាញ់ហើយចូលទៅខាងក្នុងផ្ទះរបស់ជនរងគ្រោះលួចយក ម្សៅម៉ាក CARE ចំនួន០៦ឡូ និងបារីចំនួន ០៥សុង។

បន្ទាប់ពីទទួលបណ្ដឹងជនរងគ្រោះ កម្លាំងជំនាញ នៃអធិការដ្ឋាននគរបាលស្រុសំពៅលូន បានសហការជាមួយកម្លាំងប៉ុស្តិ៍នគរបាលរដ្ឋបាលសន្តិភាព និងជនរងគ្រោះបានធ្វើការឃាត់ខ្លួនជនសង្ស័យឈ្មោះ ជឿន គន្ឋា ភេទប្រុស អាយុ ២៩ ឆ្នាំ មានទីលំនៅភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង និងវត្ថុតាង បានភ្លាមៗនៅកន្លែងកើតហេតុ បញ្ចូនមកអធិការដ្ឋាននគរបាលស្រុកសំពៅលូន ។