ឃាត់ខ្លួនយុវជន២នាក់ ករណីប្រើដុំថ្មគប់កញ្ចក់រថយន្ត អ្នកដទៃ បណ្តាលឲ្យបែក នៅស្រុកមោងឬស្សី
បាត់ដំបង ៖ កម្លាំងនៃអធិការដ្ឋាននគរបាលស្រុកមោងឬស្សី បានចុះធ្វើការបង្ក្រាបឃាត់ខ្លួន យុវជន០២នាក់ ក្រោយធ្វើសកម្មភាព ប្រើដុំថ្មគប់កញ្ចក់រថយន្ត អ្នកដទៃ បណ្តាលអោយបែកជាច្រើនកន្លែង ។
ការឃាត់ខ្លួននេះធ្វើឡើងកាលពីវេលាម៉ោង១០និង៤០នាទី ថ្ងៃទី២៦ ខែមេសា ឆ្នាំ២០២២ នៅលើផ្លូវជាតិលេខ៥ ត្រង់ចំណុចក្រុមទី១ ភូមិស្ទឹងចក ឃុំព្រៃតូច ស្រុកមោងឫស្សី ខេត្តបាត់ដំបង ដោយចោទប្រកាន់ពីបទ ធ្វើឱ្យខូចខាតដោយចេតនាមានស្ថានទម្ងន់ទោស (គប់កញ្ចក់រថយន្ត) ។
ជនសង្ស័យត្រូវបានឃាត់ខ្លួន មានឈ្មោះ ធីម លីណា ភេទប្រុស អាយុ១៩ឆ្នាំ រស់នៅភូមិកកោះ ឃុំកកោះ ស្រុកមោងឫស្សី (អ្នកបើកម៉ូតូ) និងឈ្មោះ វឿត ជាវៃ ភេទប្រុស អាយុ២០ឆ្នាំ រស់នៅភូមិជ្រៃ២ ឃុំជ្រៃ ស្រុកមោងឫស្សី (អ្នកជិះពីក្រោយ) ។ មុនឃាត់ខ្លួន ទាំង០២នាក់បានជិះម៉ូតូចំនួន០១គ្រឿងម៉ាកហុងដាឌ្រីម ពណ៌ខ្មៅ សេរីឆ្នាំ២០២១ ពាក់ផ្លាកលេខបាត់ដំបង1AM.0178 ធ្វេីសកម្មភាពយកដុំថ្មគប់ទៅលេីកញ្ចក់រថយន្តមួយគ្រឿង ម៉ាកហុីយ៉ាន់ដាយ ពណ៌ក្រហម ធុនបែនដឹកដី បើកបរដោយឈ្មោះ សុវណ្ណ កាសុី ភេទប្រុស អាយុ៣១ឆ្នាំ រស់នៅភូមិតាង៉ែន ឃុំតាគ្រៀម ស្រុកបាណន់ ខេត្តបាត់ដំបង ខណៈដែលរថយន្តកំពុងបេីកបរលេីដងផ្លូវ បណ្ដាលឱ្យបែកកញ្ចក់មើលខាងក្រោយចំហៀងផ្នែកខាងឆ្វេង០១កន្លែង និងស្រាំកញ្ចក់ខាងមុខចំហៀងខាងឆ្វេងចំនួន០២កន្លែង ។
លោកវរសេនីយ៍ឯក ស គឹមឡុង អធិការនគរបាលស្រុកមោងឬស្សី បានឱ្យដឹងថា នៅក្រោយពេលធ្វេីការសាកសួរជនសង័្សយបានឆ្លេីយសារភាពថា គេទាំងពីរនាក់ ពិតជាបានយកដុំថ្មគប់ទៅលេីរថយន្តខាងលេីទាំងថ្ងៃប្រាកដមែន ដោយសារគេខឹងនឹងរថយន្តនេះ បេីកបរចង់កៀរពួកគេដែលកំពុងជិះលេីដងផ្លូវ ប៉ុន្តែខាងអ្នកបេីកបររថយន្ត គេមានភស្តុតាងនៅក្នុងកាមេរ៉ា ដែលបំពាក់លេីរថយន្តនោះមកបញ្ជាក់ថា រថយន្តរបស់គាត់មិនបានបេីកបរដូចការលេីកឡេីងរបស់ជនសង័្សយនោះទេ ។
បច្ចុប្បន្ន ជនសង្ស័យទាំង២នាក់ ត្រូវបានកម្លាំងជំនាញ កសាងសំណុំរឿងបញ្ជូន ទៅស្នងការដ្ឋាននគរបាលខេត្តបាត់ដំបង ដើម្បីចាត់ការបន្តតាមនីតិវិធីច្បាប់ ៕
ដោយ ៖ សាលី