អ្នកសារព័ត៌មាន មកពី ៥ខេត្ត ចូលរួមវគ្គបណ្តុះបណ្តាល និងទស្សនៈកិច្ចសិក្សា ស្តីពី វឌ្ឍនភាពការងារ ក្នុងខេត្តបាត់ដំបង
បាត់ដំបង ៖ នៅថ្ងៃទី១២ ខែសីហា ឆ្នាំ២០២៣នេះ មន្ត្រីព័ត៌មាន និងអ្នកសារព័ត៌មាន ប្រមាណចំនួនជាង៨០នាក់ មកពីបណ្តាខេត្តជាប់ព្រំដែនថៃចំនួន០៥ រួមមាន ៖ បាត់ដំបង . ប៉ៃលិន . ពោធិ៍សាត់ . សៀមរាប . កោះកុង បានចូលរួមវគ្គបណ្តុះបណ្តាល និងទស្សនៈកិច្ចសិក្សា ស្តីពីវឌ្ឍនភាពការងារការអភិវឌ្ឍ និងសក្តានុពលក្នុងខេត្តបាត់ដំបង ។
នាឱកាសនោះ ឯកឧត្តម ជួន ចាន់ភារុណ ទីប្រឹក្សាក្រសួងព័ត៌មាន និងជាអគ្គនាយករង នៃអគ្គនាយកដ្ឋានព័ត៌មាន និង សោតទស្សន៍ បានមានប្រសាសន៍ថា ខេត្តបាត់ដំបង គឺជាគោលដៅដ៏ពេញនិយមសម្រាប់ភ្ញៀវទេសចរជាតិ និងអន្តរជាតិ ជាពិសេសកាអភិវឌ្ឍន៍ហេដ្ឋារចនាសម្ព័ន្ធយ៉ាងឆាប់រហ័ស ដូច្នេះ សូមលើកទឹកចិត្តអោយអ្នកសារព័ត៌មានផ្សព្វផ្សាយអំពីឌ្ឍនភាពការងារ ការអភិវឌ្ឍ និងសក្តានុពលរបស់ខេត្តទៅកាន់សាធារណជននៅកម្ពុជា និងនៅលើពិភពលោកឱ្យបានជ្រួតជ្រាប និងស្វែងយល់កាន់តែច្បាស់ចំពោះអ្វីដែលកំពុងកើតមានឡើងក្នុងមូលដ្ឋានរបស់ខ្លួន ខណៈខេត្តបាត់ដំបងគឺជាគោលដៅដ៏ពេញនិយមសម្រាប់ភ្ញៀវទេសចរជាតិ និងអន្តរជាតិ ។
ឯកឧត្តមបន្តថា ខេត្តបាត់ដំបងគឺជាខេត្តដ៏ស្រស់ស្អាតមួយក្នុងចំណោមខេត្ដដទៃទៀតនៅកម្ពុជា និងជាខេត្តធំជាងគេទី២បន្ទាប់ពីរាជធានីភ្នំពេញ ហើយបាត់ដំបងត្រូវបានគេស្គាល់ថា មានភាពស្រស់ស្អាត មានវប្បធម៌សម្បូរបែប មានទីតាំងប្រវត្តិសាស្ត្រ និងការអភិវឌ្ឍហេដ្ឋារចនាសម្ព័ន្ធយ៉ាងឆាប់រហ័ស និងជាគោលដៅដ៏ពេញនិយមសម្រាប់ភ្ញៀវទេសចរផងដែរ។
ជាមួយគ្នានេះដែរ ឯកឧត្តម សឿម ប៊ុនរិទ្ធិ អភិបាលរងខេត្តបាត់ដំបង បានមានប្រសាសន៍ឱ្យដឹងដែរថា ខេត្តបាត់ដំបងរយៈពេល៥ឆ្នាំ (២០១៨-២០២២) មានភ្ញៀវទេសចរជាតិ និងអន្តរជាតិមកទស្សនា សរុបចំនួន ២៥៧១៦៨៧នាក់ ក្នុងនោះភ្ញៀវទេសចរជាតិចំនួន ២៣១៤ ១២៦ នាក់ និងភ្ញៀវទេសចរអន្តរជាតិចំនួន ២៥៧ ៥៦១ នាក់ ហើយខេត្តបាត់ដំបងមានព្រឹត្តិការណ៍ធំៗដូចជាការរៀបចំពិធីបុណ្យទន្លេលើកទី៦ ឆ្នាំ២០២០, ពិធីសង្ក្រាន្តបាត់ដំបងដើម្បីអបអរបុណ្យចូលឆ្នាំថ្មីប្រពៃណីជាតិ,ពិធីបុណ្យអុំទូកបណ្តែតប្រទីប កម្មវិធីឆ្លងឆ្នាំសកល និងពិធីតាំងពិព័ណ៏ផ្សេងៗជាច្រើនទៀត ។
លើសពីនេះទៅទៀត ខេត្ដបាត់ដំបង ទទួលបានពានរង្វាន់ទីក្រុងទេសចរណ៍ស្អាតអាស៊ានលើកទី១ (២០១៨-២០២០), ពានរង្វាន់ទីក្រុងទេសចរណ៍ស្អាតអាស៊ានលើកទី៣ (២០២២-២០២៤), ពានរង្វាន់ផ្ការំដួល៣ទង លើកទី១ និងលើកទី២ និងថ្មីៗនេះ ខេត្តបាត់ដំបងបានទទួលជ័យលាភីលេខ១ ជាទីក្រុងដែលមានពិធីបុណ្យចូលឆ្នាំសកលល្អជាងគេប្រចាំឆ្នាំ២០២២ផងដែរ ៕
ដោយ ៖ សាលី