ថ្ងៃទី២ នៃពិធីបុណ្យចូលឆ្នាំថ្មី ភ្ញៀវទេសចរជាតិ និងអន្តរជាតិ មកលេងខេត្តប៉ៃលិនជាង៣ម៉ឺននាក់
ប៉ៃលិន ៖ នៅក្នុងថ្ងៃទី២ នៃពិធីបុណ្យចូលឆ្នាំថ្មីនេះខេត្តប៉ៃលិនទទួលភ្ញៀវទេសចរជាតិ និងអន្តរជាតិ មកលេងខេត្តប៉ៃលិន។
នេះបើតាមការផ្តល់ព័ត៌មាន ពីប្រធានមន្ទីរទេសចរណ៍ខេត្តប៉ៃលិន លោក លឹម វាសនា នៅរាត្រីថ្ងៃទី១៥ ខែមេសា ឆ្នាំ២០២២នេះ ដោយលោកបានបញ្ជាក់ថា គិតត្រឹមថ្ងៃទី២ នៃពិធីបុណ្យចូលឆ្នាំថ្មីនេះ ភ្ញៀវទេសចរមកលេងកម្សាន្តលើទឹកដីនៃខេត្តប៉ៃលិន មានចំនួនសរុប ៣៣៤៣៨នាក់ ក្នុងនោះភ្ញៀវទេសចរជាតិ ៣៣៤៣៥នាក់ ភ្ញៀវទេសចរអន្តរជាតិ០៣នាក់ ។
លោកបានបញ្ជាក់ថា ភ្ញៀវទេសចរភាគច្រើន ច្រើនទៅលេងនៅតំបន់ទេសចរណ៍ ដែលមានទឹកសម្រាប់ការងូតទឹកលេងកម្សាន្តជាពិសេសមកលេងសង្រ្កាន្តប៉ៃលិន មានការកើនឡើង ខ្លាំងនៅថ្ងៃទី២នេះ ។
តាមរយៈនេះដែរ លោក លឹម វាសនា បានបន្តការអំពាវនាវដល់អ្នកទេសចរទាំងអស់ សូមបន្តការចូលរួមអនុវត្តតាមវិធានការ ៣កុំ៣ការពារទៀត ដើម្បីទប់ស្កាត់កុំឱ្យមានការឆ្លងជំងឺកូវីដ១៩ បើទោះបីជាស្ថានភាពនៃការឆ្លងមានភាពធូរស្រាលយ៉ាងណាក៏ដោយ ៕
