រមណីយដ្ឋានភ្នំសំពៅ ទាក់ទាញភ្ភ្ញៀវទេសចរណ៍ រាប់រយនាក់ក្នុងមួយថ្ងៃ មកអង្គុយរង់ចាំមើល ហ្វូងសត្វប្រចៀវ
បាត់ដំបង ៖ ខេត្តបាត់ដំបង មានរមណីយដ្ឋាន និងកន្លែងទេសចរណ៍ប្រមាណ ១១១ កន្លែង ដែលអាចជាគោលដៅទេសចរណ៍ សំខាន់ៗ សម្រាប់ភ្ញៀវជាតិ និងអន្តរជាតិដើរកំសាន្ត ហើយក្នុងនោះ រមណីយដ្ឋានភ្នំសំពៅ គឺជារមណីយដ្ឋានធម្មជាតិមួយ ដែលមានទីតាំងនៅតាមដងផ្លូវជាតិលេខ៥៧ ស្ថិតក្នុងភូមិភ្នំសំពៅ ស្រុកបាណន់ ដែលភ្នំមួយនេះ មិនត្រឹមជារមណីយដ្ឋានធម្មជាតិ ដ៏មានប្រជាប្រិយភាពនោះទេ វាថែមទាំងមានហ្វូងសត្វប្រចៀវរាប់លានក្បាល ហោះចេញពីល្អាង ដែលអ្នកស្រុកតែងហៅថា (កងទ័ពប្រចៀវ ដ៏ក្លាហាន) និងបានទាក់ទាញភ្ភ្ញៀវទេសចរណ៍ជាតិ និងអន្តរជាតិ រាប់រយនាក់ក្នុងមួយថ្ងៃៗ មកអង្គុយរងចាំមើល ។
ក្រៅពីរមណីយដ្ឋានធម្មជាតិ ដ៏មានប្រជាប្រិយភាពមួយនេះ ភ្ញៀវទេសចរណ៍ជាតិ និងអន្តរជាតិ ក៏បានចាប់អារម្មណ៍ ទៅទស្សនានៅតាមគោលដៅទេសចរណ៍សំខាន់ៗ ជាច្រើនទៀតដូចជា , រមណីយដ្ឋានប្រាសាទបាណន់, រមណីយដ្ឋានប្រាសាទឯកភ្នំ, រមណីយដ្ឋានស្ទឹងថ្មដាចម្ការធុរេន, រមណីយដ្ឋានទឹកធ្លាក់៥៣ភ្នំព្រឹក, រមណីយដ្ឋាននគរជុំភ្នំព្រឹក, រមណីយដ្ឋានចម្ការធុរេនអូរតង, រមណីយដ្ឋានវាលចម្បាំង ខេមសាយ, សហគមន៍អេកូទេសចរណ៍ទឹកធ្លាក់អូរជាំ, រមណីយដ្ឋានស្ទឹងក្រញូង, វត្តអារាម និងអគារសាលាខេត្តចាស់ ។ល។
គួរបញ្ជាក់ថា បើយោងតាមរបាយការណ៍ របស់លោក ហម អារុណ ប្រធានការិយាល័យ នៃមន្ទីរទេសចរណ៍ខេត្តបាត់ដំបង បានឲ្យដឹងថា ស្ថិតិទេសចរណ៍ស្នាក់នៅក្នុងខេត្តបាត់ដំបង ប្រចាំត្រីមាសទី១ ឆ្នាំ២០១៨ ដល់ ឆ្នាំ២០២៣ រួមមាន ៖ ឆ្នាំ២០១៨ ចំនួនទេសចរសរុប (១៤៦,៧១៧ ក្នុងនោះទេសចរក្នុងស្រុក ចំនួន ១១៩,១៦៩ ទេសចរបរទេស ចំនួន ២៧,៥៤៨), ឆ្នាំ២០១៩ ចំនួនទេសចរសរុបមាន (១៤៦,៤៣៨ ក្នុងនោះទេសចរក្នុងស្រុក ចំនួន១១៩,១៣២ ទេសចរបរទេស ចំនួន២៧,៣០៦), ឆ្នាំ២០២០ ចំនួនទេសចរសរុបមាន (១៦៤,៥៣៣ ក្នុងនោះទេសចរក្នុងស្រុក ចំនួន ១៣៩,៤១០ ទេសចរបរទេស ចំនួន២៥,១២៣), ឆ្នាំ២០២១ ចំនួនទេសចរសរុបមាន (៧៦,៩៨៩ ក្នុងនោះទេសចរក្នុងស្រុក ចំនួន ៧៥,០៩៣ ទេសចរបរទេស ចំនួន ១,៨៨៦), ឆ្នាំ២០២២ ចំនួនទេសចរសរុបមាន (១១២,០១៤ ក្នុងនោះទេសចរក្នុងស្រុក ចំនួន ១០៩,០៨៧ ទេសចរបរទេស ចំនួន ២,៩២៧), ឆ្នាំ២០២៣ ចំនួនទេសចរសរុបមាន (១១៦,១៥៥ ក្នុងនោះទេសចរក្នុងស្រុក ចំនួន ១០៧,៣៧៣ ទេសចរបរទេស ចំនួន ៨,៧៨២) ៕
ដោយ ៖ សាលី