ជនបែកថ្នាំម្នាក់ត្រូវបានសមត្ថកិច្ចឃាត់ខ្លួនភ្លាមៗ ក្រោយធ្វើសកម្មភាពឡើង ទម្លុះទម្លាយដំបូលផ្ទះ

ខេត្តបាត់ដំបង! បុរសម្នាក់ដែលគេស្គាល់ថាជាមនុស្សបែកថ្នាំត្រូវបានសមត្ថកិច្ចឃាត់ខ្លួនភ្លាមៗ ក្រោយធ្វើសកម្មភាពឡើងទម្លុះទម្លាយដំបូលផ្ទះបង្កការភ្ញាក់ផ្អើលនៅវេលាម៉ោង ១៥និង៣០នាទី ថ្ងៃទី២៤ ខែកុម្ភៈ ឆ្នាំ២០២៣ នៅចំណុចភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង។

ប្រភពនៅកន្លែងកើតហេតុបានបញ្ជាក់ថា ជនបែកថ្នាំខាងលើមានឈ្មោះ លឹម សុខខេង ហៅ តឿ ភេទប្រុស អាយុ៤២ឆ្នាំ រស់នៅភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង ដែលជនខាងលើនេះជាមនុស្សបែក និងតែងតែបង្កបញ្ហាអោយអ្នកស្រុក ក៏ដូចជាសិស្សសាលាមានការព្រួយបារម្ភនិងភ័យខ្លាចផងដែរ។

ក្រោយបង្កការភ្ញាក់ផ្អើលខាងលើនេះដែរ ភ្លាមៗនោះសមត្ថកិច្ចនគរបាលស្រុកសង្កែ ចុះសហការជាមួយកម្លាំងប៉ុស្តិ៍នគរបាលរដ្ឋបាលអូរដំបង១ ចុះប្រតិបត្តិការបង្ក្រាបឃាត់ខ្លួនភ្លាមៗបញ្ជូនទៅកាន់អធិការដ្ឋាននគរបាលស្រុកសង្កែដើម្បីចាត់ការតាមនីតិវិធី។