រថយន្តកូរ៉េដឹកដីបុកប៉ះជាមួយម៉ូតូបណ្តាលអោយបុរសម្នាក់រងរបួសធ្ងន់

ខេត្តបាត់ដំបង! បុរសម្នាក់បានរងរបួសធ្ងន់ក្រោយជួបឧបទ្ទវហេតុគ្រោះថ្នាក់ចរាចរណ៍មួយកើតឡើងរវាងរថយន្តកូរ៉េដឹកដី០១គ្រឿងបុកប៉ះជាមួយម៉ូតូមួយគ្រឿងពេញទំហឹងនៅលើកំណាត់ផ្លូវលេខលេខ៥៧។

ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះបានកើតឡើងនៅវេលាម៉ោង ១៩និង០០នាទី ថ្ងៃទី១៨ ខែមករា ឆ្នាំ២០២៣ នៅតាមបណ្តោយផ្លូវជាតិលេខ៥៧ ត្រង់ចំណុចភូមិដំណាក់ហ្លួង សង្កាត់វត្តគរ ក្រុងបាត់ដំបង។

ប្រភពបានអោយដឹងថា 

នៅមុនពេលកើតហេតុគេឃើញម៉ូតូម៉ាកហុងដាឌ្រីមពណ៌ខ្មៅ ស៊េរីឆ្នាំ២០១៧មួយគ្រឿង ពាក់ផ្លាកលេខ បាត់ដំបង 1AA-5093 បើកបរដោយបុរសម្នាក់ក្នុងល្បឿនយ៉ាងលឿនទិសដៅពីលិចទៅកើតលុះទៅដល់ចំណុចកើតហេតុខាងលើភ្លាមនោះក៏ស្រាប់តែមានរថយន្តកូរ៉េដឹកដី ពណ៌សមួយគ្រឿង ពាក់ផ្លាកលេខចង្កូតស្តាំ BB-0596 បើកបរដោយបុរសម្នាក់ឡើងបត់ឆ្វេងក៏បានបុកពេញទំហឹងបណ្តាលអោយម៉ូតូចូលគៀបជាប់ក្នុងក្បាលរថយន្តខូចខាតយ៉ាងដំណំចំណែកអ្នកបើកបរម៉ូតូរងរបួសធ្ងន់។

ក្រោយពេលកើតហេតុសមត្ថកិច្ចជំនាញបានចុះទៅវាស់វែងធ្វើកំណត់ហេតុនិងដឹកជនរងគ្រោះទៅសង្គ្រោះព្យាបាលនៅឯមន្ទីរពេទ្យ ចំណែករថយន្តនិងម៉ូតូត្រូវបានយកទៅរក្សាទុកនៅការិយាល័យចរាចរណ៍ផ្លូវគោកខេត្តរងចាំដោះស្រាយតាមផ្លូវច្បាប់៕