ពលរដ្ឋរិះគន់ចំពោះអង្គភាពច្រកចេញឧត្តរមានជ័យថា ចំពោះការផ្តល់សេវាលិខិតឆ្លងដែន មានការយឺតយ៉ាវ
ឧត្តរមានជ័យ៖ ប្រជាពលរដ្ឋជាច្រើនគ្រួសាររស់នៅក្នុងខេត្តឧត្តរមានជ័យ និងពលរដ្ឋមកពីតាមបណ្តាលខេត្តផ្សេងៗទៀត ដែលមានបញ្ហាប្រឈមទៅនឹងជំងឺធ្ងន់ធ្ងរ បានស្នើដល់អាជ្ញាធរខេត្តឧត្តរមានជ័យ ជួយពន្លឿនក្នុងការផ្តល់សេវាចំពោះអ្នកជំងឺ ដែលមកសុំលិខិតឆ្លងដែន តាមរយៈច្រកចេញចូលតែមួយ ជួយពន្លឿនជូនប្រជាពលរដ្ឋឲ្យបានឆាប់រហ័ស។
ចំពោះករណីធ្វើបណ្ណឆ្លងដែននេះដែរកន្លងមក តែងតែមានបញ្ហាលេចលឺជាញឹកញាប់ពីប្រជាពលរដ្ឋដែលមកពីតាមបណ្តាលស្រុកឆ្ងាយៗ ក្នុងខេត្តឧត្តរមានជ័យ និងតាមខេត្តផ្សេងៗរិះគន់ចំៗចំពោះមន្រ្តីអង្គភាពច្រកចេញចូលតែមួយរបស់ខេត្តថា ការផ្តល់សេវាដល់ប្រជាពលរដ្ឋតែងតែមានការយឺតយ៉ាវ និងតម្រូវឲ្យអ្នកជំងឺដែលមានស្ថានភាពជំងឺធ្ងន់ធ្ងររួមទាំងគ្រូពេទ្យមកជាមួយដើម្បីបញ្ជាក់ថាពិតជាឈឺធ្ងន់ធ្ងរមែននោះ ទើបអាចអនុញ្ញាតធ្វើលិខិតបណ្ណឆ្លងដែនបានចេញទៅសម្រាកព្យាបាលបន្តនៅប្រទេសថៃ។
ក្នុងនោះដែរលោក ប៉ិច រតនះ នាយករងរដ្ឋបាលខេត្តឧត្តរមានជ័យ បានបញ្ជាក់ថា ចំពោះករណីប្រជាពលរដ្ឋដែលមកសុំធ្វើបណ្ណឆ្លងដែននៅអង្គភាពច្រកចេញចូលតែមួយនោះ គឺអាជ្ញាធរតម្រូវធ្វើឲ្យតែពលរដ្ឋរស់នៅក្នុងខេត្តតែប៉ុណ្តោះ ដោយពលរដ្ឋម្នាក់ត្រូវចំណាយថវិការអស់២ម៉ឺនរៀលរយៈពេល១សប្តាហ៍ទើបទទួលបាន។ ដោយឡែកសម្រាប់ពលរដ្ឋមកពីបណ្តាលខេត្តផ្សេងៗមានស្ថានភាពជំងឺធ្ងន់ធ្ងរជាក់ស្តែងអាចធ្វើជូនបាន ដោយមានភ្ជាប់មកនៅគ្រូពេទ្យមកជាមួយបញ្ជាក់ថា ឈឺពិតប្រាកដមែន។
លោកបន្តថា ករណីពលរដ្ឋដែលមានជំងឺមិនធ្ងន់ធ្ងរទេនោះអាជ្ញាធរមិនអាចធ្វើបណ្ណឆ្លងដែនជូនបានទេ និងណែនាំឲ្យពួកគាត់ត្រូវរកសេវាព្យាបាលនៅតាមមន្ទីរពេទ្យបង្អែក ឬក៏មណ្ឌលសុខភាព នៅក្បែរមូលដ្ឋានរបស់ខ្លួនវិញ រដ្ឋបាលខេត្តអនុញ្ញាតឲ្យតែចំពោះពលរដ្ឋដែលមានជំងឺធ្ងន់ធ្ងរត្រូវសង្រ្គោះបន្ទាន់តែប៉ុណ្តោះ។
គួរបញ្ជាក់ថា ករណីស្នើសុំធ្វើបណ្ណឆ្លងដែននេះដែរប្រជាពលរដ្ឋបានសម្តែងនូវការខកចិត្តគ្រប់ៗគ្នាចំពោះអង្គភាពច្រកចេញចូលតែមួយរបស់ខេត្ត ក្នុងការចេញបណ្ណឆ្លងដែនបច្ចុប្បន្ននេះ មានការយឺតយ៉ាវ បញ្ហានេះ ធ្វើឲ្យពលរដ្ឋដែលជាអ្នកមានជំងឺអាចនឹងប្រឈមកាន់តែធ្ងន់ធ្ងរបន្ថែមទៀតដោយសារតែការចេញបណ្ណមានការពន្យាពេលយឺតយ៉ាវយ៉ាងដូច្នេះ៕
