ឃាត់ខ្លួនជនសង្ស័យម្នាក់ ពីបទ លួចយកទ្រព្យសម្បត្តិ (កាបូប)
បាត់ដំបង ៖ ជនសង្ស័យម្នាក់ ត្រូវបានកម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តបាត់ដំបង ធ្វើការឃាត់ខ្លួន ករណី លួចទ្រព្យសម្បតិ្តអ្នកដទៃ ។
លោកវរសេនីយ៍ឯក ឈឿង គឹមសុង នាយការរិយាល័យនគរបាលព្រហ្មទណ្ឌកម្រិតស្រាល បានឲ្យដឹងថា ដោយអនុវត្តតាមការណែនាំបញ្ជាផ្ទាល់ ពី ឯកឧត្ដម ឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង ក៏ដូចជាមានការសម្របសម្រួលទៅលេីនីតិវិធីពី ឯកឧត្ដម កែវ សុជាតិ ព្រះរាជអាជ្ញា នៃអយ្យការអមសាលាដំបូងខេត្តបាត់ដំបងផងនោះ នៅវេលាម៉ោង ២១និង០៥នាទី ថ្ងៃទី១៣ ខែមករា ឆ្នាំ ២០២៣ លោកបានដឹកនាំកម្លាំងក្រុមអន្តរាគមន៍បង្ការបង្ក្រាប ចុះប្រតិបត្តិការបង្ក្រាបករណីលួចយកកាបូប០១ករណី នៅចំណុចភូមិកម្មករ សង្កាត់ស្វាយប៉ោ ក្រុងបាត់ដំបង ។
លោកបន្តថា ប្រតិបត្តិការនេះ សមត្ថកិច្ចបានធ្វេីការនាំខ្លួនជនសង្ស័យម្នាក់ឈ្មោះ ហៀង សុបិន្ត ភេទប្រុស អាយុ ៣៧ឆ្នាំ បច្ចុប្បន្នរស់នៅភូមិបាសែត ឃុំតាប៉ុន ស្រុកសង្កែ ខេត្តបាត់ដំបង ជាមួយវត្ថុតាងដកហូតរួមមាន ៖ មួកសុវត្ថិភាពពណ៌ស ០១, កាបូបស្ពាយពណ៌ខ្មៅ ០១, លោហធាតុពណ៌មាស ( ខ្សែ ក និង បណ្តោង ) ០១, លោហធាតុពណ៌មាស ( ចិញ្ចៀន ) ០១ វង់, លិខិតឆ្លងដែន ០១, អត្តសញ្ញាណសញ្ជាតិខ្មែរ ០១, ម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០២០ ពាក់ស្លាកលេខ បាត់ដំបង 1AK-6972 ចំនួន ០១គ្រឿង ។
លោកវរសេនីយ៍ឯក ឈឿង គឹមសុង បានបញ្ជាក់ថា ជនសង្ស័យខាងលើនេះ ជាមុខសញ្ញាលួច(យកកាបូប) របស់ជនរងគ្រោះឈ្មោះ លឹម សានិត ភេទស្រី អាយុ ៤០ឆ្នាំ កាលពីវេលាម៉ោងប្រហែល ១០និង៥២នាទី នៅចំណុចភូមិអញ្ចាញ សង្កាត់អូរចារ ក្រុងបាត់ដំបង។
ក្រោយឃាត់ខ្លួន ជនសង្ស័យ ត្រូវបានកម្លាំងជំនាញកសាងសំណុំរឿង បញ្ជូនទៅសាលាដំបូងខេត្តបាត់ដំបងចាត់ការតាមនីតិវិធី ចំណែកសម្ភារៈត្រូវបានប្រគល់ជូនម្ចាស់វិញផងដែរ ៕
ដោយ ៖ សាលី