កូរ៉េខាងជើងបាញ់មីស៊ីលអន្តរទ្វីបបាលីស្ទិកធំបំផុត ICBM ដោយជោគជ័យ
កូរ៉េខាងជើង៖ កូរ៉េខាងជើងបានប្រកាសថា ខ្លួនបានបាញ់សាកល្បងមីស៊ីលអន្តរទ្វីបបាលីស្ទិកដ៏ធំបំផុតរបស់ខ្លួន ICBM ដោយជោគជ័យកាលពីថ្ងៃព្រហស្បតិ៍។
សារព័ត៌មានរដ្ឋកូរ៉េខាងជើង នៅថ្ងៃសុក្រនេះ បាននិយាយថា ការបាញ់ចុងក្រោយបំផុតរបស់កូរ៉េខាងជើងគឺជាមីស៊ីលអន្តរទ្វីបបាលីស្ទីក ICBM ដ៏ធំ និងថ្មីមួយក្នុងការសាកល្បងចុងក្រោយដែលលោក Kim Jong Un បានហៅថា ជាការបង្ហាញអំណាចរបស់កម្លាំងនុយក្លេអ៊ែរ និងរារាំងសកម្មភាពយោធារបស់សហរដ្ឋអាមេរិក។
ការបាញ់កាលពីថ្ងៃព្រហស្បតិ៍បានក្លាយជាការសាកល្បងលើកដំបូង សម្រាប់ប្រទេសនេះដែលបានបាញ់មីស៊ីលអន្តរទ្វីប ICBM ដែលត្រូវបានហាមប្រាមដោយអង្គការសហប្រជាជាតិចាប់តាំងពីឆ្នាំ២០១៧ មក។
មីស៊ីលអន្តរទ្វីប ICBMs គឺជាមីស៊ីលរយៈចម្ងាយឆ្ងាយដែលមានសមត្ថភាពបាញ់ដល់ទឹកដីអាមេរិក។ កូរ៉េខាងជើងត្រូវបានហាមឃាត់មិនឲ្យសាកល្បងប្រភេទមីស៊ីលទាំងនោះ និងត្រូវបានរងទណ្ឌកម្មយ៉ាងធ្ងន់ធ្ងរចំពោះការបំពានបម្រាមនោះ។ សារព័ត៌មានរដ្ឋនិយាយថា លោក Kim Jong-un បានឈរបញ្ជាដោយផ្ទាល់ការបាញ់សាកល្បងនេះ ហើយអាវុធនោះគឺជាវត្ថុដ៏សំខាន់ក្នុងការរារាំងសង្គ្រាមនុយក្លេអ៊ែរ៕
