មនុស្ស០២ក្រុម វាយនិងកាប់គ្នាទៅវិញទៅមក ចុងក្រោយត្រូវសមត្ថកិច្ច ឃាត់ខ្លួន ០៣នាក់

បាត់ដំបង ៖ ជនសង្ស័យ ៣នាក់ ក្នុងចំណោមបក្សពួកគ្នា១០នាក់ ត្រូវបានកម្លាំងនគរបាលស្រុកសំពៅលូន ឃាត់ខ្លួន ក្រោយពួកគេធ្វើសកម្មភាព ប្រដាប់ដោយកាំបិត វាយនិងកាប់គ្នាទៅវិញទៅមក នៅវេលាម៉ោងប្រហែល ២៣និង០៥នាទី ថ្ងៃទី៣១ ខែធ្នូ ឆ្នាំ២០២២ នៅចំណុចបូរីងិនវ៉ិត ស្ថិតក្នុងក្រុមទី០៦ ភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង  ។

សមត្ថកិច្ច បានអោយដឹងថា ជនសង្ស័យទាំងពីរក្រុម ក្នុងនោះ ក្រុម១មានគ្នា០៤នាក់ ដែលទី១-ឈ្មោះ ឡុង ឬ ខ្លុង ភេទប្រុស អាយុប្រហែល ៣១ឆ្នាំ ស្នាក់នៅបណ្តាះអាសន្ន ក្នុងភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង (ជាជនដៃដល់) បានធ្វើសកម្មភាពយកកាំបិតប៉័ងតោ កាប់ទៅលើបក្សពួកម្ខាងទៀត បណ្តាលឲ្យរងរបួសចំនួន០២នាក់ រួចរត់គេចខ្លួនបាត់ ។ ទី២-ឈ្មោះ ប៉ោ ពៅ ភេទប្រុស អាយុ ៣៦ឆ្នាំ ស្នាក់នៅបណ្តាះអាសន្ន ក្នុងភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង (ជាបក្សពួក)រងរបួស ដាច់ដៃខាងឆ្វេង (ដាច់ប្រអប់ដៃ)ធ្ងន់ កំពុងសម្រាកព្យាបាលនៅមន្ទីរពេទ្យបង្អែកខេត្តបាត់ដំបង ។ ទី៣-ឈ្មោះ ជៀវ វី ភេទប្រុស អាយុ ៣៣ឆ្នាំ មានទីលំនៅបណ្ដោះអាសន្នក្នុងភូមិវាលវង់ ឃុំតាស្ដា ស្រុកសំពៅលូន ខេត្តបាត់ដំបង បក្សពួករងរបួសថ្ងាស  ស្រាល (ឃាត់ខ្លួនបាន) ។ ទី៤-ឈ្មោះ ខ្លី ភេទប្រុស អាយុប្រហែល៣២ឆ្នាំ មានទីលំនៅបណ្ដោះអាសន្ន ក្នុងភូមិវាលវង់ ឃុំតាស្ដា ស្រុកសំពៅលូន  ខេត្តបាត់ដំបង ជាបក្សពួក(គេចខ្លួនបាត់ ) ។ និងក្រុមទី២ មានគ្នា ០៦នាក់  ដែលទី១-ឈ្មោះ ខែម សុខា ហៅ កាត់ ភេទប្រុស អាយុ១៩ឆ្នាំ មានទីលំនៅក្នុងភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង  រងរបួសក្បាលពីរលើមធ្យម  និងជាជនដៃដល់បានយកកាំបិតផ្គាក់ កាប់ទៅលើបក្សពួកម្ខាងទៀតបណ្តាលឲ្យរងរបួសដាច់ដៃធ្ងន់ (ឃាត់ខ្លួនបាន) ។ ទី២-ឈ្មោះ ផែន សម្បត្តិ ភេទប្រុស អាយុ១៩ឆ្នាំ មានទីលំនៅក្នុងភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង ជាបក្សពួក រងរបួសម្រាមចង្អុរដៃខាងស្តាំមធ្យម (ឃាត់ខ្លួនបាន) ។ ទី៣-ឈ្មោះ  ហើម ភេទប្រុស អាយុ  ប្រហែល ៣០ ឆ្នាំ មានទីលំនៅក្មុងភូមិវាលវង់ ឃុំតាស្ដា ស្រុកសំពៅលូន ខេត្តបាត់ដំបង បក្សពួក (គេចខ្លួនបាត់) ។ ទី៤-ឈ្មោះ ប៉ាវ  ភេទប្រុស អាយុប្រហែល១៨ឆ្នាំ មានទីលំនៅក្មុងភូមិវាលវង់ ឃុំតាស្ដា ស្រុកសំពៅលូន  ខេត្តបាត់ដំបង បក្សពួក (គេចខ្លួនបាត់)  និងបក្សពួកចំនួន០២នាក់ទៀត មិនស្គាល់អត្តសញ្ញាណបានរត់គេចខ្លួនបាត់ សមត្ថកិច្ចកំពុងធ្វើការស្រាវជ្រាវបន្ត ។

ប្រតិបត្តិការនេះ សមត្ថកិច្ចបានដកហូតវត្ថុតាង រួមមាន ៖ កាំបិតផ្គាក់ដងដែក ចំនួន០១ , ម៉ូតូម៉ាក MSX ពណ៌ខៀវ គ្មានស្លាកលេខ ចំនួន ០១គ្រឿង និងទូរស័ព្ទដៃ ចំនួន០៣ គ្រឿងផងដែរ ។

ក្រោយពីឃាត់ខ្លួន ជនសង្ស័យទាំងបីនាក់ខាងលើ ត្រូវបានសមត្ថកិច្ចបញ្ជូនមកកាន់ការិយាល័យជំនាញ ដើម្បីចាត់ការតាមនីតិវិធី ៕

ដោយ ៖ សាលី