ខេត្តបន្ទាយមានជ័យ មានមណ្ឌលប្រឡង ៧មណ្ឌល ស្មើនឹង ២៣៣បន្ទប់ បេក្ខជនមានឈ្មោះប្រឡង ជិត៦ពាន់នាក់
បន្ទាយមានជ័យ ៖ ដំណេីរការប្រឡងសញ្ញាបត្រ មធ្យមសិក្សាទុយិភូមិ បានចាប់ផ្តេីមដំណេីការប្រឡងនៅព្រឹកថ្ងៃទី៥ ខែធ្នូ ឆ្នាំ២០២២ នៅទូទាំងប្រទេស ជាក់ស្តែងនៅខេត្តបន្ទាយមានជ័យ មានមណ្ឌលប្រឡង ៧មណ្ឌល ស្មើនឹង ២៣៣បន្ទប់ បេក្ខជនមានឈ្មោះប្រឡង ជិត៦ពាន់នាក់ ។
លោក អ៊ុំ រាត្រី អភិបាលខេត្តបន្ទាយមានជ័យ បានមានប្រសាសន៍ ជូនពរ ដល់បេក្ខជនដែលបានចូលរួមប្រឡង សូមទទួលបានលទ្ធផលល្អទាំងអស់គ្នា ការខិតខំប្រឹងរៀនសូត្រ ដែលក្មួយៗខិតខំប្រឹងប្រែងរយៈពេល១២ឆ្នាំ នឹងត្រូវបានសម្រេចនូវរយៈពេល២ថ្ងៃនេះ ។ លោកក៏បាន ជំរុញដល់ក្មួយៗបេក្ខជនប្រឡង ត្រូវខិតខំប្រឡងដោយយកចិត្តទុក្ខដាក់ បំពេញនូវឯកសារប្រឡងឱ្យបានត្រឹមត្រូវ ធ្វេីឱ្យអស់ពីលទ្ធភាព ។
ជាមួយគ្នានេះលោក ឈូ ប៊ុនរឿង ប្រធានមន្ទីអប់រំ យុវជន និងកីឡាខេត្តបន្ទាយមានជ័យ បានឱ្យដឹងថា ការប្រឡង មធ្យមសិក្សាទុតិយភូមិ (បាក់ឌុប) ឆ្នាំ២០២២ នៅខេត្តបន្ទាយមានជ័យ មានមណ្ឌលប្រឡង ចំនួន៧ មណ្ឌល និង២៣៣បន្ទប់ (ថ្នាក់វិទ្យាសាស្រ្ត និង ថ្នាក់វិទ្យាសាស្រ្ត សង្គម ) រួមមាន ៖ ថ្នាក់វិទ្យាសាស្រ្ត (វិទ្យាល័យ សម្តេចឪ, សាលាបឋមសិក្សា ហ៊ុន សែន សូភី, វិទ្យាល័យ ហ៊ុន សែន ខ្លាកូន) ថ្នាក់វិទ្យាសាស្រ្ត សង្គម ( វិទ្យាល័យ សិរីសោភ័ណ, សាកលវិទ្យាល័យ គ្របគ្រង និងសេដ្ឋកិច្ច UME, វិទ្យាល័យ អូរអំបិល និងសាកលវិទ្យាល័យជាតិ មានជ័យ NCU ។
លោកប្រធានមន្ទីរអប់រំ បញ្ជាក់ថា នៅក្នុងឆ្នាំ២០២២នេះ បេក្ខជនដែលមានឈ្មោះប្រឡង ចំនួន ៥៨០២នាក់ ក្នុងនោះស្រី៣១៧៦នាក់ ៕
